QazUÝ professorlarynyń ailyǵy 163%-ǵa ósti
Memleket basshysy Qasym-Jomart Toqaevtyń joǵary oqý oryndary oqytýshylarynyń jalaqysyn arttyrý týraly tapsyrmasyna sáikes, bilim ordasynyń Basqarma Tóraǵasy – Rektor Janseiit Túimebaevtyń sheshimimen endigi jerde oqytýshy – 200 000 teńge, aǵa oqytýshy – 280 000 teńge, dotsent – 330 000 teńge, professor 500 000 teńge jalaqy alady.
Budan bólek, rektor nusqaýymen QazUÝ-da ár jarty jyl saiyn Scopus málimetter bazasynyń jýrnaldarynda maqala jariialaǵan avtorlarǵa qomaqty qarjylai syiaqy beriletin boldy. Respýblikalyq bedeldi ǵylymi tanymdyq gazet-jýrnaldarda maqalasy jaryq kórgen oqytýshylarǵa da jylyna eki ret arnaiy bonýstar tólenedi.
Sondai-aq ǵalym-oqytýshylardyń jaryq kórgen oqý quraldary, monografiialary men kitaptary úshin de ýniversitettegi indikativtik jospar boiynsha ball berilip, syiaqy taǵaiyndaý joldary qarastyrylyp otyr.
Eńbekaqyny ósirý básekelestikti arttyryp, ýniversitetke myqty mamandardyń kelýine jol ashpaq. Sol sebepten QazUÝ-da jalaqynyń artýymen qatar, oqytýshy-professorlyq quramnyń kásibi biliktiligin kóterý, talantty jastarǵa qoldaý kórsetý jumystary júieli jolǵa qoiylýda. Oqytýshylyq qyzmetke konkýrstyq negizde eń bilikti ári bilimdi mamandar iriktelinip alynady.
Bul sharalar bilim berý sapasyn arttyrýǵa, oqytýshylardy áleýmettik qoldaýǵa jáne oqytýshy bedelin arttyrýǵa baǵyttalǵan. Ǵalym-oqytýshylardyń artyq júktemeden arylyp, oqý úderisine, zertteý jumystaryna jáne sabaqtyń sapasyna kóńil qoiýy úshin barlyq jaǵdai jasalýda.
Aita ketsek, aǵymdaǵy jyldyń aqpan aiynda QazUÝ rektory Janseiit Túimebaevtyń buiryǵymen oqý ordasyndaǵy barlyq qyzmetkerlerdiń jalaqysy 20 paiyzǵa ósken bolatyn. Kúni keshe Scopus derekter bazasynyń halyqaralyq reitingtik basylymdarynda maqala jariialaǵan 234 ǵalym 74,8 mln. qarjylai syiaqymen marapattaldy.
