Ál-Farabı atyndaǵy QazUÝ janyndaǵy Jańa hımıalyq tehnologıalar jáne materıaldar ǵylymı-zertteý ınstıtýytnyń ǵalymdary elimizde óndiriletin qońyr kómirden gýmındi qyshqyl alýdyń tehnologıasyn oılap tapty, – dep habarlaıdy «Memlekettik ulttyq ǵylymı-tehnıkalyq saraptama ortalyǵy» AQ Baspasóz qyzmeti.
Mańyzdy ǵylymı-zertteý jumysyna h.ǵ.d., profesor E.A.Áýbákirov jetekshilik jasaǵan.
Gýmındi qyshqyl – molekýlalyq qurylymy joǵary tabıǵı ortada organıkalyq túrde kezdesetini belgili. Ol ósimdik shirindilerinen paıda bolatyndyqtan, gýmındi qyshqyl mıkroorganızmderge baı qarashirindi, sý jáne ottegiden turady.
Búginde gýmındi qyshqyl saýyqtyratyn qasıetke ıe bolǵandyqtan ǵalymdar ony medısına men veterınarıa salasynda keńinen qoldanyp kele jatqanyn bilemiz. Onyń quramy 70 jýyq paıdaly zat men 20-ǵa jýyq amınqyshqyldary bar. Sonymen qatar gýmındi qyshqyl peptıd, mıneral, gormon, polıfenol, hınonǵa óte baı.
Jaqynda QazUÝ ǵalymdary elimizdegi «Qıaqty», «Oı Qaraǵaı», «Mamyt» kenishterindegi qońyr kómirden gýmındi qyshqyl alýǵa bolatynyn ǵylymı turǵydan dáldep berdi. Olar kómirdi últradybystyq óńdeýden ótkizip, gýmındi qyshqyl alýdyń tyń tehnologıasyn usynýda. Osylaısha qazaq ǵalymdary gýmındi qyshqyl alýdyń dástúrli jolynyń orynyn basatyn tıimdi tásildi taýyp, ǵylymı ortanyń qoldaýyna ıe boldy.
Aldaǵy ýaqytta últradybystyq óńdeý arqyly alynǵan gýmındi qyshqyldaryn mal sharýashylyǵy salasynda janýarlardyń ósýin jedeldetetin stımýlátor jáne mıkrotyńaıtqysh retinde paıdalanýǵa bolatynyn aıtýda.