Ózbekstan azamaty Abdýlqadyr Masharıpov kinásin moıyndady, dep habarlady Stambýl gýbernatory Vasıp Shahınge silteme jasaǵan "Húrrıet Deılı” basylymy. Masharıpovty túrik polısıasy 1 qańtarda stambýldyq Reina túngi klýbynda terrorlyq shabýyl jasady degen kúdikpen ustaǵan bolatyn.
Gýbernatordyń aıtýynsha, ol Aýǵanstanda daıyndyqtan ótken, "Islam memleketi" terrorlyq toby atynan áreket etken.
Abdýlqadyr Masharıpovtyń ustalǵany týraly dúısenbi kúni tańerteń belgili boldy. Túrik baspasóziniń habarlaýynsha, ony stambýldyq Esenúrt aýdanynda qolǵa túsirgen. Bir kún buryn polısıa kúdikti toqtaǵan páterden 150 myń dollar tapqan edi. Ol Stambýlǵa shabýyldan eki apta buryn kelgen.
Resmı emes málimetter boıynsha, Masharıpov Túrkıaǵa 2016 jyldyń basynda áıeli men eki balasymen kóship kelip, Koná qalasynda páter jaldap turǵan. 15 jeltoqsanda ol Stambýlǵa terrorlyq shabýyl jasaý úshin barǵan.
Jańa jyl túni ol klýbqa taksımen kelgen, klýbqa jartylaı avtomatty vıntovka alyp kirip, adamdardy ata bastaǵan. Shabýyldan 39 adam qaza tapty, 65-i jaralandy. Qaza bolǵandar arasynda segiz eldiń azamattary bar.
