Mańǵystaý oblysynda respýblikalyq mańyzy bar «Jetibai – Jańaózen – Kendirli – Túrikmenstan shekarasy» avtojolyn kúrdeli jóndeý jobasynda smetalyq qujattardan artyq eseptelgen shyǵyndar anyqtaldy. Bul týraly Bas kólik prokýratýrasy málim etti, dep habarlaidy dalanews.kz.
Prokýratýra ókilderiniń málimetinshe, jol jobalaryn zerdeleý barysynda atalǵan avtojoldy jóndeýge arnalǵan jobalyq-smetalyq qujattamada keibir qurylys materialdary men jumys túrleriniń baǵasy durys kórsetilmegeni belgili bolǵan.
Prokýrorlyq qadaǵalaý nátijesinde joba quny qaita eseptelip, onyń jalpy quny 21,6 mlrd teńgeden 18,9 mlrd teńgege deiin tómendetildi. Osylaisha, prokýrorlardyń aralasýy biýdjet qarajatynyń 2,7 mlrd teńgesin negizsiz jumsaýdyń aldyn alýǵa múmkindik bergen.
Vedomstvo jol salasynda biýdjet qarjysynyń tiimdi jumsalýyn baqylaý jumystary jalǵasyp jatqanyn atap ótti. Jóndelip jatqan jol ýchaskesiniń jalpy uzyndyǵy 50 shaqyrymdy quraidy. Qurylys jumystaryn «QazAvtoJol» UK» AQ júrgizip jatyr.
Kompaniianyń málimetinshe, biyl jolǵa asfalt-beton jabynynyń eki qabaty tóselip, kólik qozǵalysy qamtamasyz etilgen. Sonymen qatar ýaqytsha jol belgileri ornatylyp, ýaqytsha jolaqtar syzylǵan. Al usaq túiirshikti asfalt-betonnan turatyn úshinshi qabatty tóseý kelesi jyldyń jaz mezgiline josparlanǵan.
Joba boiynsha qurylys jumystaryn 2027 jyldyń úshinshi toqsanynda aiaqtaý kózdelip otyr.
