وزبەكستان ازاماتى ابدۋلقادىر ماشاريپوۆ كىناسىن مويىندادى، دەپ حابارلادى ستامبۋل گۋبەرناتورى ۆاسيپ شاحينگە سىلتەمە جاساعان "حيۋرريەت دەيلي” باسىلىمى. ماشاريپوۆتى تۇرىك پوليسياسى 1 قاڭتاردا ستامبۋلدىق Reina تۇنگى كلۋبىندا تەررورلىق شابۋىل جاسادى دەگەن كۇدىكپەن ۇستاعان بولاتىن.
گۋبەرناتوردىڭ ايتۋىنشا، ول اۋعانستاندا دايىندىقتان وتكەن، "يسلام مەملەكەتى" تەررورلىق توبى اتىنان ارەكەت ەتكەن.
ابدۋلقادىر ماشاريپوۆتىڭ ۇستالعانى تۋرالى دۇيسەنبى كۇنى تاڭەرتەڭ بەلگىلى بولدى. تۇرىك ءباسپاسوزىنىڭ حابارلاۋىنشا، ونى ستامبۋلدىق ەسەنيۋرت اۋدانىندا قولعا تۇسىرگەن. ءبىر كۇن بۇرىن پوليسيا كۇدىكتى توقتاعان پاتەردەن 150 مىڭ دوللار تاپقان ەدى. ول ستامبۋلعا شابۋىلدان ەكى اپتا بۇرىن كەلگەن.
رەسمي ەمەس مالىمەتتەر بويىنشا، ماشاريپوۆ تۇركياعا 2016 جىلدىڭ باسىندا ايەلى مەن ەكى بالاسىمەن كوشىپ كەلىپ، كونيا قالاسىندا پاتەر جالداپ تۇرعان. 15 جەلتوقساندا ول ستامبۋلعا تەررورلىق شابۋىل جاساۋ ءۇشىن بارعان.
جاڭا جىل ءتۇنى ول كلۋبقا تاكسيمەن كەلگەن، كلۋبقا جارتىلاي اۆتوماتتى ۆينتوۆكا الىپ كىرىپ، ادامداردى اتا باستاعان. شابۋىلدان 39 ادام قازا تاپتى، 65ء-ى جارالاندى. قازا بولعاندار اراسىندا سەگىز ەلدىڭ ازاماتتارى بار.
