Ál-Farabi atyndaǵy Qazaq ulttyq ýniversitetinde zamanaýi Farabi Chem Science klasteri ashyldy. Quramyna 9 ǵylymi zerthana kiretin klaster himiia jáne himiialyq tehnologiia fakýltetinde ornalasqan, dep habarlaidy Dalanews.kz.
Klasterdiń maqsaty – ekologiia, himiia, meditsina, munai-himiia jáne energiiany kóp qajet etetin materialtaný salalarynda zertteýler júrgizip, jańa sheshimder ázirleý.
Ashylý saltanatyna QR ǵylym jáne joǵary bilim ministri Saiasat Nurbek, Garvard ýniversitetiniń professory, zertteýshi-ǵalym Mark Elliot, Ál-Farabi atyndaǵy Qazaq ulttyq ýniversitetiniń Basqarma Tóraǵasy – Rektor Janseiit Túimebaev, ǵalymdar, jas zertteýshiler, oqý ordasynyń oqytýshylary qatysty.
Qurmetti qonaqtarǵa himiia jáne himiialyq tehnologiia fakýltetiniń dekany Alina Galeeva jańadan ashylǵan zerthanalar týraly tolyq aqparat berip, qyzmetimen tanystyrdy.
Shara barysynda Saiasat Nurbek Memleket basshysy Qasym-Jomart Toqaevtyń otandyq ǵylym men bilimdi damytýǵa jáne innovatsiialyq tásilderdi engizýge airyqsha mán berip otyrǵanyna toqtaldy.
«Almatyda ótken jas ǵalymdarmen kezdesýde Prezident: «Biz kóshke ilesetin emes, kóshti bastaityn elderdiń qatarynda bolýymyz kerek. Bir sózben aitqanda, ǵylymi áleýetimizdi arttyrý qajet», – dep atap ótti. Búgingi QazUÝ bazasynda ashylyp jatqan zerthanalar elimizdiń himiia salasyn damytyp, himiia ónerkásibi salasyndaǵy jumystardy tereńdetý úshin asa mańyzdy», – dedi Saiasat Nurbek.
Óz kezeginde Ál-Farabi atyndaǵy Qazaq ulttyq ýniversitetiniń Basqarma Tóraǵasy – Rektor Janseiit Túimebaev zerthanalar himiiadan bólek, meditsina jáne biologiia salasyndaǵy ózekti máselelerdi sheshýge sep bolatynyn aitty.
Atalǵan ǵylymi zerthanalar metall jáne aǵash konstrýktsiialarǵa arnalǵan otqa tózimdi jabyndardy jasaýǵa, arnaiy qasietteri bar beiorganikalyq materialdardyń jańa túrlerin zertteýge, zattar men materialdardy sandyq jáne sapalyq taldaý boiynsha qyzmetterdi oryndaýǵa mol múmkindik beredi. Sondai-aq zertteýshiler qorshaǵan ortany lastaýshy zattardy anyqtap, taldaý, himiialyq tok kózderine arnalǵan jańa materialdardy ázirleý, munai himiiasy salasynda tereńdetilgen zertteýler júrgizý, otandyq meditsinalyq-biologiialyq quraldar men bakteriiaǵa qarsy qorǵanysh jabyndaryn alýdyń ońtaily ádisterin ázirleý jumystaryn júrgizedi. Munda ǵalymdardyń emin-erkin jumys isteýleri úshin qolaily jaǵdai jasalǵan, sondai-aq sońǵy úlgidegi qurylǵylar jáne apparattarmen jabdyqtalǵan.
Aita keteiik, ýniversitette himiia-tehnologiialyq beiindegi úsh ǵylymi-zertteý institýty jumys isteidi. Himiialyq ǵylymi klasterine analitikalyq himiia jáne qorshaǵan orta zerthanasy, elektrohimiialyq óndiris tehnologiiasy zerthanasy, munai-himiia zerthanasy, himiia-meditsinalyq zerthana, juqa organikalyq sintez zerthanasy, energiiany kóp qajet etetin nanomaterialdar zerthanasy, perspektivalyq materialdar men tehnologiialar zerthanasy, joǵary dáldiktegi materialdardy diagnostikalaý zerthanasy jáne Chemical Coatings Innovations ǵylymi-óndiristik ortalyǵy kiredi. Sonymen qatar AlemTrade kompaniiasynyń demeýshiligimen ashylǵan joǵary dáldiktegi materialdardy zertteý zerthanasyn atap ótken jón.
QR ǴJBM granttyq jáne baǵdarlamalyq-nysanaly qarjylandyrý jobalary men demeýshilik sýbsidiialardy iske asyrý sheńberinde satyp alynǵan jańa qurylǵylardyń quny 1 mlrd teńgeni quraidy.
