QTJ Aqtaý portynda konteiner habyn salady. Bul jumysty Qytaidaǵy iri port toptarynyń biri — Lianiýnganmen birlesip atqarady dep habarlaidy «Qazaqstan temir jol tasymaly» baspasóz qyzmeti.
KTZ Express bas direktory Damir Qojahmetov Qytaida is-saparmen barǵanda Lianiýngan portynyń basshylyǵymen kezdesken edi. Qos tarap birlesip port salý týraly aqyldasqan.
«Konteiner haby Aqtaý porty arqyly túrli baǵytta konteiner júkterin óńdep, tasymaldaýǵa qatysty sharalar keshenin júrgizýge kerek infraqurylym jasaýǵa jol ashady. Sonymen birge Kaspii óńiri men Ortalyq Aziia elderi úshin konteinerlik aǵyn jáne servis qalyptastyrýǵa septigin tigizedi» delingen habarlamada.
Sáýirdiń sońynda Qazaqstanda teńiz infraqurylymyn damytýǵa baǵyttalǵan 2024-2028 jyldarǵa arnalǵan keshendi jospar qabyldanǵan edi. Soǵan sáikes, konteiner habyn salý jumystary biyl bastalyp, 2025 jyly paidalanýǵa berilýi kerek bolǵan. Hab qurylysyna 43,4 mlrd teńge bólinedi. Biraq ol qarajat biýdjetten bolmaidy.
KTZ Express qytailyq portpen buǵan deiin de birge jumys istep kórgen. Atap aitqanda, kólik logistika salasynda eki jobany iske asyrǵan: Horgos qurǵaq porty men Lianiýngan portyndaǵy terminal. QTJ-daǵylardyń aitýynsha, eki el arasyndaǵy logistikalyq protsester ońtailanyp, Qazaqstan arqyly tranzitpen júk jibergende de jaqsy bola túsedi.
