Qasym-Jomart Toqaev qoqys óńdeitin kásiporyndar salýdy tapsyrdy, - dep habarlaidy Dalanews.kz.
"Odan bólek, qoqys óńdeitin kásiporyndar salý qajet. Onsyz qalalarymyz taza bolmaidy. Jalpy "Taza Qazaqstan" degen sózdi keń aýqymda túsingen jón dep sanaimyn. Tazalyq eń áýeli adamnyń sana-seziminen bastalýǵa tiis. Peiili taza adamnyń isi berekeli bolady.
Biz qazir ult sapasyn jaqsartýǵa basa mán berip otyrmyz. Men Atyraýda ótken Quryltaida jańa qundylyqtar qalyptastyrý máselesine toqtaldym. Qazir memleket pen qoǵamnyń arasynda osyǵan qatysty ortaq ustanym bar. Bul qundylyqtar oqý oryndarynyń tárbie jumysyna arqaý bolýy kerek. Ókinishke qarai, qoǵamda ozbyrlyq pen qatygezdik tyiylmai tur. Mundai jaǵymsyz úrdis, ásirese, jastar arasynda beleń alýda.
Biz máseleniń túp-tamyry tereńde jatqanyn ashyq aitýymyz kerek. Áleýmettik jeli balalardyń minez-qulqyna keri áser etip jatqany sózsiz. Biraq bárin áleýmettik jelige jaba salýǵa bolmaidy. Bilim berý júiesinde kemshilikter kóp. Otbasy tárbiesinde de olqylyq bar. Árbir ata-ana balasyna durys tálim-tárbie berýi qajet. Úlkender óziniń kúndelikti is-áreketimen balalarǵa úlgi bolýy kerek.
Elimizdegi balalardyń bári qorshaǵan álemmen úilesimdi, ata-anasy men jaqyndarynyń súiispenshiligine jáne meiirimine bólenip ósýi mańyzdy. Ol úshin, eń aldymen, otbasyndaǵy zorlyq-zombylyq syndy qarańǵylyqtyń, moraldyq degradatsiianyń órshýin túp-tamyrymen joiý qajet", - dedi Prezident.
