پرەزيدەنت قوقىس وڭدەيتىن كاسىپورىندار سالۋدى تاپسىردى

ساعىنىش سارداروۆا 31 مام. 2024 17:31 2864

قاسىم-جومارت توقايەۆ قوقىس وڭدەيتىن كاسىپورىندار سالۋدى تاپسىردى، - دەپ حابارلايدى Dalanews.kz.

"ودان بولەك، قوقىس وڭدەيتىن كاسىپورىندار سالۋ قاجەت. ونسىز قالالارىمىز تازا بولمايدى. جالپى "تازا قازاقستان" دەگەن ءسوزدى كەڭ اۋقىمدا تۇسىنگەن ءجون دەپ سانايمىن. تازالىق ەڭ اۋەلى ادامنىڭ سانا-سەزىمىنەن باستالۋعا ءتيىس. پەيىلى تازا ادامنىڭ ءىسى بەرەكەلى بولادى.

ءبىز ءقازىر ۇلت ساپاسىن جاقسارتۋعا باسا ءمان بەرىپ وتىرمىز. مەن اتىراۋدا وتكەن قۇرىلتايدا جاڭا قۇندىلىقتار قالىپتاستىرۋ ماسەلەسىنە توقتالدىم. ءقازىر مەملەكەت پەن قوعامنىڭ اراسىندا وسىعان قاتىستى ورتاق ۇستانىم بار. بۇل قۇندىلىقتار وقۋ ورىندارىنىڭ تاربيە جۇمىسىنا ارقاۋ بولۋى كەرەك. وكىنىشكە قاراي، قوعامدا وزبىرلىق پەن قاتىگەزدىك تىيىلماي تۇر. مۇنداي جاعىمسىز ءۇردىس، اسىرەسە، جاستار اراسىندا بەلەڭ الۋدا.

ءبىز ماسەلەنىڭ ءتۇپ-تامىرى تەرەڭدە جاتقانىن اشىق ايتۋىمىز كەرەك. الەۋمەتتىك جەلى بالالاردىڭ مىنەز-قۇلقىنا كەرى اسەر ەتىپ جاتقانى ءسوزسىز. ءبىراق ءبارىن الەۋمەتتىك جەلىگە جابا سالۋعا بولمايدى. ءبىلىم بەرۋ جۇيەسىندە كەمشىلىكتەر كوپ. وتباسى تاربيەسىندە دە ولقىلىق بار. ءاربىر اتا-انا بالاسىنا دۇرىس تالىم-تاربيە بەرۋى قاجەت. ۇلكەندەر ءوزىنىڭ كۇندەلىكتى ىس-ارەكەتىمەن بالالارعا ۇلگى بولۋى كەرەك.

ەلىمىزدەگى بالالاردىڭ ءبارى قورشاعان الەممەن ۇيلەسىمدى، اتا-اناسى مەن جاقىندارىنىڭ سۇيىسپەنشىلىگىنە جانە مەيىرىمىنە بولەنىپ ءوسۋى ماڭىزدى. ول ءۇشىن، ەڭ الدىمەن، وتباسىنداعى زورلىق-زومبىلىق سىندى قاراڭعىلىقتىڭ، مورالدىق دەگراداسيانىڭ ءورشۋىن تۇپ-تامىرىمەن جويۋ قاجەت"، - دەدى پرەزيدەنت.


ۇسىنىلعان
سوڭعى جاڭالىقتار