Marapatty TMD jáne Ortalyq Aziia elderi boiynsha QS reitingtik agenttiginiń aimaqtyq direktory Sergei Hristoliýbov QazUÝ-dyń Basqarma Tóraǵasy – Rektory Janseiit Túimebaevqa tabystady.
Sergei Hristoliýbov QazUÝ-dyń sońǵy jyldardaǵy jetistikterin atap ótip, QS jahandyq reitingindegi talaptarǵa toqtaldy.
– Ál-Farabi atyndaǵy QazUÝ biyl kóptegen talaptar boiynsha óz kórsetkishterin edáýir jaqsartty. Halyqaralyq deńgeidegi reitingte 150-orynǵa jaiǵasý bul úlken kórsetkish jáne jetistik. Mundai QazUÝ tarihynda bolmaǵan. Ýniversitettiń damýyna súbeli úles qosyp, eńbek etken oqytýshy-professorlar quramy, ǵalymdar men barlyq ujymǵa alǵysymdy bildirgim keledi. Bul sizderdiń eńbekterińiz.
Máselen, sizderdiń bilim ordalaryńyz damyǵan memleketterdiń ýniversitetteri arasynan oza shyǵyp aldyńǵy qatarǵa jaiǵasty. Bul bilim ordasynda aýqymdy jumystar atqarylǵanyn kórsetedi. Shara aiasynda ýniversitettiń aldaǵy damý josparymen jáne ǵalymdar ázirlegen ǵylymi-innovatsiialyq jobalarymen tanystyq. Aldaǵy jumystaryńyzǵa tabys tileimin, – dedi Sergei Hristoliýbov.
Óz kezegide ýniversitet basshysy Janseiit Túimebaev halyqaralyq reiting qazaqstandyq joǵary oqý oryndary úshin jyl saiyn óz kórsetkishterin jetildirýge múmkindik beretinin jetkizdi.
– Bir jyl ishinde oqý ornymyz 175-orynnan 25 pozitsiiaǵa joǵarylady. QS WUR jahandyq reitingindegi jańa kórsetkishimiz – 150-oryn. Bul biz úshin úlken jetistik ári joǵary jaýapkershilik. QazUÝ – «QS Stars Rating System» halyqaralyq reitingisinde «Bes juldyz» marapatyn alǵan Ortalyq Aziiadaǵy alǵashqy jáne jalǵyz joǵary oqý orny.
Sondai-aq, QS by Subject pándik reitingisinde ýniversitet 4 pán salasy men 16 daiyndyq baǵyty boiynsha úzdikter qataryna kiredi. Ýniversitettiń 137 bilim berý baǵdarlamasynyń halyqaralyq deńgeidegi básekege qabilettiligin dáleldeidi. Bul ýniversitet ujymynyń kóp jylǵy jáne kúndelikti tynymsyz eńbeginiń nátijesi, – dep atap ótti rektor.
Sondai-aq, ýniversitet basshysy barlyq ǵalymdardy, oqytýshy-professorlar quramy men qyzmetkerlerdi quttyqtap, bul jetistikpen toqtap qalmai, mejeli maqsattarǵa jetý jolynda tabysty eńbek etýge shaqyrdy.
Sonymen qatar, is-shara barysynda himiia jáne himiialyq tehnologiia fakýltetiniń professory Zulhair Mansurov, Instituto Universitário de Lisboa professory Postolah Oktavian, halyqaralyq bilim berý amerikandyq keńester uiymynyń joǵary bilim berý baǵdarlamalarynyń basqarýshy direktory Grem Hettlinger, Kolýmbiia ýniversitetiniń doktory Mamata Hanýmappa, himiia jáne himiialyq tehnologiia fakýltetiniń aǵa oqytýshysy Gemil Ahmat, fizika-matematika ǵylymdarynyń doktory, professor Mýzzammil Ilahi jáne doktorant Arifioglý Abdýrrahman Zeki QazUÝ ujymyn quttyqtap, jyly lebizderin bildirdi.
Aita keteiik, QS WUR álemniń úzdik ýniversitetteriniń tizimi 2004 jyldan beri jariialanyp keledi. Aǵymdaǵy jyly reitingke álemniń 100 elinen 2,5 myńǵa jýyq JOO qatysqan bolatyn.
