Keshe, 2025 jyly 22 qańtarda "Qazaqtelekom" AQ aktsiialary quldyrap, Qazaqstan qor birjasy (KASE) jumysyn kilt toqtatýǵa májbúr boldy. Ulttyq teleoperatordyń baǵaly qaǵazdary birden 33,09% qunyn joǵaltyp, 41,1 myń teńgeden 27,5 myń teńgege deiin bir-aq tómendedi. Bul tehnikalyq qatelik pe, álde investorlarǵa berilgen bir belgi me, sarapshylar osy saýaldar tóńireginde oi bildirip kórdi, dep jazady Dalanews.kz.
Negizi, naryq oiynshylary "Tele2/Altel mobildi servisin satýdan túsken qarajattan dividendter tólenip qalatyn bolar" dep eleń-alań bolyp otyrǵan. Týra osy kezde aktsiia baǵamy ońbai quldyraidy ǵoi. Árine, investorlar shoshyp ketti, bul "ózderi dámeli dividentterdi tólemeýdiń bir amaly emes pe" degen jaman oilar da qylań berip úlgerdi. Al sarapshylar qaýymy muny sonshalyqty kúrdeli máselege balamaidy, kerisinshe tehnikalyq qatemen bailanystyrady.
Bul rette inbusiness.kz Andrei Chebotarev pen Arman Bataev syndy sarapshylardyń pikirin alǵa tartady.
Qarjy salasy boiynsha sarapshy Andrei Chebotarev mundai kúrt quldyraý kompaniiamen de, jalpy naryqpen de bailanysty mańyzdy problemalardy tanytpaidy dep sanaidy. Quldyraý úshin 3 myń dollar men 100 aktsiia jetkilikti bolǵan.
"Bul bizdiń naryqtyń tereńdigin kórsetpeidi jáne álbette, insaiderlik is-qimyldar bolýy múmkin. Múmkin bireý paida tapqysy kelgen shyǵar. Múmkin, bul tipti fat finger de shyǵar, iaǵni qate mámile (sondaida qoldanylatyn termin)", - dep túsindiredi sarapshy.
Sondai-aq týra osyndai jaǵdai 2022 jyldyń qańtarynda bolǵanyn eske saldy. Ol kezde Kaspi.kz aktsiialarynyń baǵasy 30%-ǵa deiin tómendegen.
Qarjyger Arman Bataev ta osyndai pikirde. Ol mundai jaǵdailar kóbinese tehnikalyq qateliktermen bailanysty ekenin aitady.
"Kóbinese mundai qatelikter treider kezdeisoq josparlanǵannan áldeqaida kóp nemese az aktsiialardy kórsetkende oryn alady. Sóitip ózine qarsy satyp alý tapsyrystary joq ekenin baiqamai qalady. Nátijesinde "Qazaqtelekomnyń" ótimdi emes artyqshylyqqa ie aktsiialary aitarlyqtai quldyrady, al ótimdiligi joǵary qarapaiym aktsiialardyń baǵasy is júzinde ózgergen joq", — dep inbusiness.kz Bataevtyń sózin keltiredi.
Andrei Chebotarev ta bul arada artyqshylyqqa ie aktsiialar týraly sóz bolyp otyrǵanyn naqtylaidy. Olar qarapaiymnan ielerine dividend alýǵa kepildik berý boiynsha erekshelenetinin aitady. Máselen, qarapaiym aktsiialarda tólemder kompaniianyń sheshimine jáne onyń tapqan paidasyna bailanysty eseptelse, al artyqshylyqqa ie aktsiialarda dividendter qarjylyq kórsetkishterge qaramastan tólenýi kerek. Osy jaǵynan alǵanda, eger bul kompaniiamen bailanysty naqty problema bolsa,onda artyqshylyqqa ie aktsiialar ǵana emes, qarapaiym aktsiialar da quldyraityn edi.
"... Shyndyǵynda, bul tipti insaider de bolmaýy múmkin, óitkeni jaǵymdy nemese jaǵymsyz aqparattan qulaǵdar insaider bul arada óz paidasyn tabýdy oilaidy. Nashar jaǵdaida ol qarapaiym aktsiialardy da satatyn edi. Sondyqtan, bul tehnikalyq qatelikke saiady", - deidi ol.
Al tehnikalyq qatelik degen KASE jumysyna keletin úlken syn. Rasynda, bul rette jelide mazaq "memder" paida bolyp úlgerdi.
Kúni keshe, 14 qańtarda "Qazaqtelekom" Pih Communication LLC enshisine sai "Mobail Telekom-Servis" JShS Jarǵylyq kapitalyndaǵy qatysý úlesiniń 100%-yn satý jónindegi mámileni túiindedi. Osylaisha Tele2/Altel brendterimen jumys isteitin MTS mobildi operatory qatarlyq kompaniiaǵa satyldy. 2024 jyldyń maýsym aiynda TsDIAÓM basshysy Jaslan Mádiev mámile somasy 1 mlrd dollar bolatynyn shamalady (keiinirek bul somanyń 1,1 mlrd dollar ekeni naqtylandy). Sondai-aq sarapshylar "Qazaqtelekomǵa" tiesili Kcell-di de satady dep boljaǵan. Alaida,keshe, 15 qańtarda osy sipattaǵy saýalǵa "Qazaqtelekom" "Kcell-degi úlesin satpaý kerek degen ustanymda ekenderin jetkizdi.
1 qazandaǵy jaǵdai boiynsha, "Qazaqtelekomnyń" iri aktsionerleri "Samuryq-Qazyna" qory (71,32%) jáne Jusan Bank (8,1%) bolyp tabylady. Qańtar-qyrkúiek ailarynyń qorytyndysy boiynsha kompaniianyń taza paidasy 40,5%-ǵa, 53,1 mlrd teńgege deiin qysqardy
2025 jyly 15 qańtarda KASE-de "Qazaqtelekomnyń" aktsiialary kenetten qymbattaǵan bolatyn. Bul arada 7,1% ósim boldy.
