كەشە، 2025 جىلى 22 قاڭتاردا "قازاقتەلەكوم" اق اكسيالارى قۇلدىراپ، قازاقستان قور بيرجاسى (KASE) جۇمىسىن كىلت توقتاتۋعا ءماجبۇر بولدى. ۇلتتىق تەلەوپەراتوردىڭ باعالى قاعازدارى بىردەن 33،09% قۇنىن جوعالتىپ،  41،1 مىڭ تەڭگەدەن 27،5 مىڭ تەڭگەگە دەيىن ءبىر-اق تومەندەدى. بۇل تەحنيكالىق قاتەلىك پە، الدە ينۆەستورلارعا بەرىلگەن ءبىر بەلگى مە، ساراپشىلار وسى ساۋالدار توڭىرەگىندە وي ءبىلدىرىپ كوردى، دەپ جازادى Dalanews.kz.

نەگىزى، نارىق ويىنشىلارى "Tele2/Altel ءموبيلدى سەرۆيسىن ساتۋدان تۇسكەن قاراجاتتان ديۆيدەندتەر تولەنىپ قالاتىن بولار" دەپ ەلەڭ-الاڭ بولىپ وتىرعان. تۋرا وسى كەزدە اكسيا باعامى وڭباي قۇلدىرايدى عوي. ارينە، ينۆەستورلار شوشىپ كەتتى، بۇل "وزدەرى دامەلى ديۆيدەنتتەردى تولەمەۋدىڭ ءبىر امالى ەمەس پە" دەگەن جامان ويلار دا قىلاڭ بەرىپ ۇلگەردى. ال ساراپشىلار قاۋىمى مۇنى سونشالىقتى كۇردەلى ماسەلەگە بالامايدى، كەرىسىنشە تەحنيكالىق قاتەمەن بايلانىستىرادى.

بۇل رەتتە inbusiness.kz  اندرەي چەبوتاريەۆ پەن ارمان باتايەۆ سىندى ساراپشىلاردىڭ پىكىرىن العا تارتادى.

قارجى سالاسى بويىنشا ساراپشى اندرەي چەبوتاريەۆ مۇنداي كۇرت قۇلدىراۋ كومپانيامەن دە، جالپى نارىقپەن دە بايلانىستى ماڭىزدى پروبلەمالاردى تانىتپايدى دەپ سانايدى. قۇلدىراۋ ءۇشىن 3 مىڭ دوللار مەن 100 اكسيا جەتكىلىكتى بولعان.

"بۇل ءبىزدىڭ نارىقتىڭ تەرەڭدىگىن كورسەتپەيدى جانە البەتتە، ينسايدەرلىك ءىس-قيمىلدار بولۋى مۇمكىن. مۇمكىن بىرەۋ پايدا تاپقىسى كەلگەن شىعار. مۇمكىن، بۇل ءتىپتى fat finger دە شىعار، ياعني قاتە مامىلە (سوندايدا قولدانىلاتىن تەرمين)"، - دەپ تۇسىندىرەدى ساراپشى.

سونداي-اق تۋرا وسىنداي جاعداي 2022 جىلدىڭ قاڭتارىندا بولعانىن ەسكە سالدى. ول كەزدە Kaspi.kz اكسيالارىنىڭ باعاسى 30%-عا دەيىن تومەندەگەن. 

قارجىگەر ارمان باتايەۆ تا وسىنداي پىكىردە. ول مۇنداي جاعدايلار كوبىنەسە تەحنيكالىق قاتەلىكتەرمەن بايلانىستى ەكەنىن ايتادى.

"كوبىنەسە مۇنداي قاتەلىكتەر ترەيدەر كەزدەيسوق جوسپارلانعاننان الدەقايدا كوپ نەمەسە از اكسيالاردى كورسەتكەندە ورىن الادى. ءسويتىپ وزىنە قارسى ساتىپ الۋ تاپسىرىستارى جوق ەكەنىن بايقاماي قالادى. ناتيجەسىندە "قازاقتەلەكومنىڭ" ءوتىمدى ەمەس ارتىقشىلىققا يە اكسيالارى ايتارلىقتاي قۇلدىرادى، ال وتىمدىلىگى جوعارى قاراپايىم اكسيالاردىڭ باعاسى ءىس جۇزىندە وزگەرگەن جوق"، — دەپ inbusiness.kz باتايەۆتىڭ ءسوزىن كەلتىرەدى.

اندرەي چەبوتاريەۆ تا بۇل ارادا ارتىقشىلىققا يە اكسيالار تۋرالى ءسوز بولىپ وتىرعانىن ناقتىلايدى. ولار قاراپايىمنان يەلەرىنە ديۆيدەند الۋعا كەپىلدىك بەرۋ بويىنشا ەرەكشەلەنەتىنىن ايتادى. ماسەلەن، قاراپايىم اكسيالاردا تولەمدەر كومپانيانىڭ شەشىمىنە جانە ونىڭ تاپقان پايداسىنا بايلانىستى ەسەپتەلسە، ال ارتىقشىلىققا يە اكسيالاردا ديۆيدەندتەر قارجىلىق كورسەتكىشتەرگە قاراماستان تولەنۋى كەرەك. وسى جاعىنان العاندا، ەگەر بۇل كومپانيامەن بايلانىستى ناقتى پروبلەما بولسا،وندا ارتىقشىلىققا يە اكسيالار عانا ەمەس، قاراپايىم اكسيالار دا قۇلدىرايتىن ەدى.

"... شىندىعىندا، بۇل ءتىپتى ينسايدەر دە بولماۋى مۇمكىن، ويتكەنى جاعىمدى نەمەسە جاعىمسىز اقپاراتتان قۇلاعدار ينسايدەر بۇل ارادا ءوز پايداسىن تابۋدى ويلايدى. ناشار جاعدايدا ول قاراپايىم اكسيالاردى دا ساتاتىن ەدى. سوندىقتان، بۇل تەحنيكالىق قاتەلىككە سايادى"، - دەيدى ول.

ال تەحنيكالىق قاتەلىك دەگەن KASE جۇمىسىنا كەلەتىن ۇلكەن سىن. راسىندا، بۇل رەتتە جەلىدە مازاق "مەمدەر" پايدا بولىپ ۇلگەردى.

كۇنى كەشە، 14 قاڭتاردا "قازاقتەلەكوم" Pih Communication LLC ەنشىسىنە ساي "موبايل تەلەكوم-سەرۆيس" ج ش س جارعىلىق كاپيتالىنداعى قاتىسۋ ۇلەسىنىڭ 100%-ىن ساتۋ جونىندەگى مامىلەنى تۇيىندەدى. وسىلايشا  Tele2/Altel برەندتەرىمەن جۇمىس ىستەيتىن متس ءموبيلدى وپەراتورى قاتارلىق كومپانياعا ساتىلدى. 2024 جىلدىڭ ماۋسىم ايىندا ءسدياوم باسشىسى جاسلان مادييەۆ مامىلە سوماسى 1 ملرد دوللار بولاتىنىن شامالادى (كەيىنىرەك بۇل سومانىڭ 1،1 ملرد دوللار ەكەنى ناقتىلاندى). سونداي-اق ساراپشىلار "قازاقتەلەكومعا" تيەسىلى Kcellء-دى  دە ساتادى دەپ بولجاعان. الايدا،كەشە، 15 قاڭتاردا وسى سيپاتتاعى ساۋالعا "قازاقتەلەكوم" "Kcell-دەگى ۇلەسىن ساتپاۋ كەرەك دەگەن ۇستانىمدا ەكەندەرىن جەتكىزدى. 

1 قازانداعى جاعداي بويىنشا، "قازاقتەلەكومنىڭ" ءىرى اكسيونەرلەرى "سامۇرىق-قازىنا" قورى (71،32%) جانە Jusan Bank (8،1%) بولىپ تابىلادى. قاڭتار-قىركۇيەك  ايلارىنىڭ قورىتىندىسى بويىنشا كومپانيانىڭ تازا پايداسى 40،5%-عا، 53،1 ملرد تەڭگەگە دەيىن قىسقاردى

2025 جىلى 15 قاڭتاردا KASE-دە "قازاقتەلەكومنىڭ" اكسيالارى كەنەتتەن قىمباتتاعان بولاتىن. بۇل ارادا 7،1% ءوسىم بولدى.