Búgin, 2025 jyly 23 qańtarda Qazaqstan qor birjasyndaǵy saýda-sattyqta "Qazaqtelekomnyń" artyqshylyqqa ie aktsiialary burynǵy baǵamyna qaita oraldy. Keshegi joǵaltqan 33,09% ornyna, tipti 51,6% ósim bolyp, bir aktsiia quny 41 709 teńge boldy, dep jazady Dalanews.kz.
Keshe birjada ulttyq operatordyń artyqshylyqqa ie bir aktsiiasynyń quny 41,1 myń teńgeden 27,5 myń teńgege deiin bir-aq tómendegen edi. Sarapshylardyń basym bóligi muny tehnikalyq qatelikke balaǵan. Ony óz tilderinde fat finger deidi eken. Iaǵni, qate tirkelgen mámile.
Al "Qaztelekomnyń" ózi keshegi quldyraýdy (-33,09%) spekýliativtik is-qimylmen bailanystyrady:
"Artyqshylyqqa ie aktsiialardyń qulaýy onyń dividendter tólemine, tómen ótimdilikke jáne spekýliativtik is-qimylǵa táýeldiligimen bailanysty bolýy múmkin"
Iaǵni, kompaniialar bul qaǵazdardyń ótimdiligi tómen ekenin moiyndaidy.
"Investorlar men spekýlianttar dúrbeleń týǵyzyp, artynan ony tómen baǵada satyp alý úshin maqsatty túrde artyqshylyqqa ie aktsiialardy satýy múmkin", - deidi kompaniiadaǵylar.
Al jaǵdaidyń bulai oiysýyna invsetorlar aktsiiany satqan kezde ony alatyndar tabylmai qalyp, baǵa qulaǵan. Bar-joǵy 2,2 mln teńgege 75 baǵaly qaǵaz satylyp, saýda-sattyq aiaqtalǵanǵa deiin baǵa 27 500 teńgege deiin túsken.
Iaǵni, jeme-jemge kelgende baǵany qoldaityn satyp alýshylardyń jetkilikti kólemi bolmai qalǵan.
Buǵan deiin saitymyzda: "Qazaqtelekom" aktsiialary qatty quldyrap, KASEý-shý boldy. Sarapshylar ne deidi?" degen maqala jariialanǵan.
