Premer-ministr Oljas Bektenov Qazaqstan ekonomikasynyń ósimi men halyqtyń naqty tabysynyń tómendeýi arasyndaǵy aiyrmashylyqtyń sebebin túsindirdi, dep habarlaidy dalanews.kz.
Senat depýtaty Sergei Karpliýk Úkimet basshysyna 2025 jyly el ekonomikasy 6,5 paiyz óskenimen, Ulttyq statistika biýrosynyń málimeti boiynsha halyqtyń naqty tabysy 2 paiyz tómendep, infliatsiia 12 paiyzdan asqanyn aitty. Ol mundai jaǵdaida ekonomikalyq ósimniń qarapaiym azamattardyń turmys deńgeiine nege áser etpegenin surady.
Oljas Bektenovtiń sózinshe, Úkimet úshin ekonomikalyq ósim óz aldyna maqsat emes, halyqtyń ál-aýqatyn jaqsartýdyń quraly.
"Ekonomikalyq ósim – túpki maqsat emes. Basty mindet – azamattardyń ál-aýqatyn arttyrý. Sondyqtan turaqty ekonomikalyq ósimdi qamtamasyz etý arqyly halyqtyń ómir súrý sapasyn jaqsartýǵa kúsh salyp kelemiz", – dedi premer-ministr.
Úkimet basshysy pandemiiadan keiin Qazaqstan ekonomikasy jyl saiyn orta eseppen 5 paiyz ósip kele jatqanyn atap ótti. Onyń aitýynsha, bul – el ekonomikasy úshin oń úrdis, sondyqtan Úkimet osy qarqyndy saqtap qalýǵa nietti.
Sonymen birge Oljas Bektenov ótken jyly joǵary infliatsiia halyqtyń naqty tabysyna áser etkenin jasyrmady. Onyń aitýynsha, 2025 jyldyń qyrkúieginde infliatsiia 12,9 paiyzǵa deiin jetken.
"Byltyr biz ekonomikanyń ósýimen qatar infliatsiialyq qysymnyń kúsheigenin baiqadyq. Qabyldanǵan sharalardyń nátijesinde biylǵy bes aidyń qorytyndysy boiynsha infliatsiia deńgeii 10,4 paiyzǵa deiin tómendedi. Aldaǵy ýaqytta ony 10 paiyzdan da tómen túsirýdi josparlap otyrmyz", – dedi Oljas Bektenov.
Premer-ministrdiń aitýynsha, Úkimet pen Ulttyq bank infliatsiiany tejeý jáne halyqtyń satyp alý qabiletin arttyrý baǵytyndaǵy jumysty jalǵastyra beredi.
