Qazaqstannyń jalpy ishki ónimi (JIÓ) ósip jatqanymen, bul qarapaiym halyqtyń turmysyn jaqsartýǵa áser etpei otyr. Bul týraly Parlament palatalarynyń birlesken otyrysynda JSDP fraktsiiasynyń jetekshisi Ashat Rahymjanov málimdedi, dep habarlaidy dalanews.kz.
Depýtattyń aitýynsha, eldegi resmi infliatsiia 12,3%-dy qurap, josparlanǵan 5,5–7,5% dálizinen áldeqaida asyp ketken. Onyń sózinshe, naqty infliatsiia budan da joǵary.
– Bul JIÓ kim úshin ósip jatyr? Azyq-túlik baǵasy 13,5%-ǵa qymbattady. Sonyń saldarynan qazaqstandyqtardyń shyǵyn qurylymynda tamaqqa jumsalatyn qarajattyń úlesi 52%-ǵa jetti. Eger otbasy tabysynyń jartysynan kóbin azyq-túlikke jumsasa, bul turaqtylyq emes, kúnkóris úshin kúres, – dedi Rahymjanov.
Ol nominaldy jalaqy ósip jatqanymen, infliatsiiany esepke alǵanda naqty jalaqy 3,2%-ǵa tómendegenin aitty. Sonymen qatar halyqtyń shamadan tys nesiege táýeldiligine nazar aýdaryp, muny «tabys toqyraǵan jaǵdaida kún kórýdiń amaly» dep atady.
– Ákimdikter esepterinde ózderine jaily kórinis qalyptastyrǵan. Al, mysaly, Abai oblysy men Soltústik Qazaqstan oblysynyń turǵyndary áleýmettik járdemaqylarynyń úshten birin azyq-túlikke jumsaýǵa májbúr. JSDP mundai saiasat áleýmettik kúireýge alyp keledi dep esepteidi. Bizge kózqarasty túbegeili ózgertý qajet, – dedi depýtat.
Osyǵan bailanysty Ashat Rahymjanov eń tómengi jalaqy mólsherin kóterýdi, baǵaǵa naqty baqylaý ornatýdy jáne turǵyn úi-kommýnaldyq qyzmet tarifteriniń ósýin toqtatýdy talap etti.
Onyń pikirinshe, «Investitsiiaǵa aiyrbas retinde tarif» saiasaty halyqtyń turmysyn tómendetý esebinen júzege asyrylmaýy tiis.
