Kásipker Jumabek Janyqulovtyń burynǵy jubaiy Janna Janyqulova áleýmettik jelide sot protsesine qatysty málimdeme jariialady, dep habarlaidy dalanews.kz.
Onyń aitýynsha, ol Jumabek Janyqulovpen 20 jyl zańdy nekede turǵan jáne bes balany dúniege ákelgen. Janna Janyqulova ajyrasýǵa jubaiynyń opasyzdyǵy sebep bolǵanyn málimdedi.
Qazirgi ýaqytta Almaty qalasynyń aýdanaralyq sotynda neke sharty men aliment tóleý týraly kelisimdi jaramsyz dep taný jónindegi is qaralyp jatyr.
«Nekede turǵan kezde múlik pen neke sharty týraly másele eshqashan kóterilgen emes. Bul másele Jumabek Janyqulovtyń ómirinde basqa áiel paida bolyp, ajyrasý týraly sheshim qabyldaǵannan keiin ǵana týyndady», – dep jazdy ol.
Janna Janyqulovanyń sózinshe, 24 maýsymdaǵy sot otyrysynda olardyń birde-bir ótinishhaty qanaǵattandyrylmaǵan. Onyń ishinde kásipkerdiń tabysyna qatysty málimetterdi qaraý týraly ótinish te bolǵan.
«Biz salyq organdarynan tek bir ǵana kompaniia boiynsha málimet usyndyq. Onda sońǵy úsh jyldaǵy kiris kólemi 20 milliard teńgeden asatyny kórsetilgen. Al mundai kompaniialar sany 18-ge jýyq. Alaida sot bul jaitqa nazar aýdarmady», – deidi ol.
Osyǵan bailanysty talapker tarap sýdiaǵa qarsylyq (otvod) bildirgen.
Sonymen qatar Janna Janyqulova burynǵy jubaiynyń qarjylyq jáne ákimshilik múmkindikterin eskere otyryp, istiń ádil qaralýyna alańdaitynyn jetkizdi. Ol qoǵam ókilderi men sot júiesine qatysy bar laýazymdy tulǵalardan atalǵan isti baqylaýda ustaýdy surady.
Aita keteiik, tanymal telejúrgizýshi Dinara Sátjan kásipker Jumabek Janyqulovpen shańyraq kóterdi. Bul jańalyq áleýmettik jelilerde keńinen talqylanyp, qoǵam nazaryn aýdarǵan edi.
Ázirge Jumabek Janyqulov pen onyń ókilderi atalǵan málimdemege qatysty resmi pikir bildirgen joq.
