Búgin Abaı atyndaǵy Qazaq Ulttyq pedagogıkalyq ýnıversıtetinde «Qazaqstannyń úshinshi jańǵyrýy: Áıel. Qoǵam. Bilim jáne ǵylym» atty halyqaralyq sımpozıým ótti. Shara aıasynda «Qazaqstandyq ǵalym áıelder qoǵamy» atty birlestiktiń saltanatty ashylýy ótip, qoǵam múshelerine arnaıy kýálik tabys etildi.
Sımpozıýmdabilim men ǵylymdy damytýdaǵy áıel ǵalymdardyń alar orny, tilderdi oqytý men úıretýdegi ınnovasııalar, Qazaqstan damýynyń zamanaýı kezeńindegi otbasy men otbasylyq qundylyqtar, qoǵamdyq qatynastardyń jahandanýy kontekstindegi adam quqyǵynyń damýy taqyryptarynda dóńgelek ústel ótkizip, búgingi ózekti taqyryptardy talqylady.
Sımpozıýmǵa medısına, fılologıa, fılosofıa, pedagogıka, aýylsharýashylyǵy, til, jaratylystyq ǵylymdar salasynyń úzdik mamandary, elimizge tanymal ǵalymdar qatysty. Olar «Qazaqstandyq ǵalym áıelder qoǵamyn» qurý arqyly elimizdegi 400 myńǵa jýyq ǵalym áıelderdiń el ómirine, qoǵam tynysyna óz únderin jetkizip, kez kelgen ózekti máseleni keńirek talqylaýǵa, ózderiniń balama josparlary men oılaryn usynýdy kózdep otyrǵandaryn jetkizdi.
Tańat AIaPOVA, fılologıa ǵylymdarynyń doktory, profesor, «Qazaqstandyq ǵalym áıelderi qoǵamy» birlestiginiń prezıdenti:
– Ótken ǵasyrdyń toqsanynshy jyldarynyń basynda AQSH-qa baryp, biraz jyl ýnıversıtette sabaq berdim. Sonda olarda ǵalym áıelderdiń birigýimen ashqan qoǵamdyq qorlary bar ekenin bildim. Olar ózderiniń qoǵamdyq birlestikteri arqyly jańa jobalar daıyndap, memlekettik ıakı jekemenshik sektorlarǵa ózderiniń usynystaryn usynady. Qoǵamdaǵy túrli isterge óz oı-pikirlerin jetkizip, keıbir memlekettik mańyzdy baǵdarlamalarǵa balamaly josparlaryn usynady eken. Sol qoǵamǵa men de múshe boldym. Olardyń erkindikterine, talapshyldyǵyna tánti bolǵan edim. Sodan beri Qazaqstanda osyndaı qoǵam nege joq degen suraq meni mazalap júrgen. Mundaı qoǵam Qyrǵyzstan men Ózbekstannyń ózinde bar ekenin jýyrda bildim. Olardyń jumys tájirıbesin zerttep kórdim. El istegendi biz nege istemeımiz? Qazaqstanda 400 myńǵa jýyq ǵalym áıel bar eken. Olar mamandyqtary boıynsha ár salada jemisti eńbek etip júr. Olardyń ortaq uıymy bolǵany zaman talaby degen oıdamyn.
Qazir qoǵamdyq birlestikter, uıymdar kóp. Demokratıaly eldiń negizgi tireýi – osy uıymdar men qorlar, birlestikter. Olardyń árqaısysy óz mindet-maqsatyna saı oıdaǵydaı jumys istese, qoǵam alǵa jyljıdy.
Al bizdiń maqsat – qoǵamdyq ózekti taqyryptarǵa ǵalym áıelderdiń únin jetkizý, olardyń pikirleri men ǵylymı tujyrymdaryn usyný. Aıtalyq, qazir búgin úılenip, erteń ajyrasyp ketý qalypty jaǵdaıǵa aınaldy. Bundaı úrdis qaıdan keldi? Nege jetim balalar kóp? Nege otbasy qundylyǵy joıylyp barady? Qoǵamdyq formasıa ózgergen tusta bizdiń dástúrli qundylyqtar toqyraýǵa ushyraǵany jasyryn emes. Biz ǵalymdardyń jıi bas qosyp, konferensıalar ótkizip, ózderiniń túıgenderi men túsingenderin, zerttegen taqyryptaryn keńirek nasıhattaýǵa tıispiz. Bizdiń qoǵamnyń atqarar jumysy óte kóp. Aldaǵy ýaqytta arnaıy baǵdarlamalar ázirlep, tıisti mekemelermen birlesip qyzmet atqaratyn bolamyz.
