Qazaqstan Respýblikasynyń Memlekettik keńesshisi Erlan Qarin Almaty qalasyndaǵy Á.Marǵulan atyndaǵy Arheologiia institýtynda “Qazaqstan tarihy: ejelgi dáýirden búginge deiin” atty jańa akademiialyq basylymdy ázirlep jatqan jetekshi ǵalymdarmen kezdesti, dep habarlaidy Dalanews.kz.
Memleket basshysy 2021 jylǵy qańtarda jaryq kórgen “Táýelsizdik bárinen qymbat” atty maqalasynda zamanaýi ǵylymi tásilderdi qoldana otyryp, Qazaqstan tarihynyń kóptomdyǵyn daiyndaý týraly bastama kótergen bolatyn.
Ǵylym jáne joǵary bilim vitse-ministri Darhan Ahmed-Zaki, sondai-aq tomdardyń redaktsiialyq alqalarynyń jetekshileri men músheleri – Á.Marǵulan atyndaǵy Arheologiia institýtynyń bas direktory Aqan Ońǵar, Sh.Ýálihanov atyndaǵy Tarih jáne etnologiia institýtynyń bas ǵylymi qyzmetkeri Bolat Kómekov, Sh.Ýálihanov atyndaǵy Tarih jáne etnologiia institýty direktorynyń orynbasary Jomart Jeńis, Joshy Ulysyn zertteý ǵylymi institýtynyń bas ǵylymi qyzmetkeri Aibolat Kóshkimbaev, R.B.Súleimenov atyndaǵy Shyǵystaný institýty janyndaǵy Tarihi materialdardy zertteý boiynsha respýblikalyq aqparattyq ortalyǵynyń direktory Merýert Ábýseiitova, Sh.Ýálihanov atyndaǵy Tarih jáne etnologiia institýtynyń direktory Ziiabek Qabyldinov, Sh.Ýálihanov atyndaǵy Tarih jáne etnologiia institýty direktorynyń orynbasary Shámek Tileýbaev, Memleket tarihy institýty direktorynyń orynbasary Búrkitbai Aiaǵan kóptomdyqty ázirleý jumysy týraly Memlekettik keńesshige aqparat berdi.
Jiynda Erlan Qarin Qazaqstan tarihy týraly akademiialyq basylymdy ázirleý barysynyń aralyq qorytyndysyn jasady. Memlekettik keńesshi kóptomdyqtyń daiyndyq dárejesin baǵalai otyryp, osy ǵylymi jobany júzege asyrý utymdy ári obektivti kózqarastardy, barlyq tarihi faktilerdi, materialdar men qujattardy jan-jaqty zerdeleýdi jáne sońǵy jyldardaǵy ǵylymi jańalyqtardy ainalymǵa engizýdi qajet etetinin atap ótti.
Bul jobaǵa 5 ǵylymi institýt, elimizdiń 250-den jáne sheteldiń 60-tan astam tarihshy ǵalymdary jumyldyryldy. Kóptomdyqqa 40-tan asa arheologiialyq zertteý materialdary, tarih, arheologiia jáne etnografiia salalary boiynsha 300-ge jýyq eńbek enetin bolady.
Akademiialyq basylymdy daiyndaý barysynda halyqaralyq forýmdardyń, kóptegen ǵylymi konferentsiianyń, dóńgelek ústelder men ádistemelik seminarlardyń aiasynda arnaiy sektsiialar ótti. Osy is-sharalarda ǵylymi zertteýlerdiń nátijeleri tekserildi, sondai-aq ǵalymdardan, sarapshylardan jáne mamandardan usynystar alyndy.
