Sheteldikter Almatyda terrorlyq akt jasamaq bolǵan. Osy oqiǵaǵa bailanysty dintanýshy Erkinbek Shoqai óz pikirin bildirip, terrorizmniń astarynda ideologiialyq jáne áleýmettik sebepterdiń jatqanyn atap ótti, dep habarlaidy Dalanews.kz
«Terrorizm qaýpiniń syrtynda, árine, ideologiialyq jáne saiasi astar bar. Bizdiń eldiń tatýlyǵy men birligi keibir taraptarǵa unamaidy. Sol sebepti olar túrli ideologiialyq negizderdi, sonyń ishinde dini baǵytty da paidalanady», – deidi sarapshy.
Erkinbek Shoqaidyń aitýynsha, mundai qaýip-qaterlerdiń belsendiligine ishki faktorlar da áser etedi. Ásirese, qoǵamdaǵy keibir áleýmettik álsiz toptar men jumyssyz jastar radikaldy aǵymdardyń yqpalyna beiim bolýy múmkin.
«Bizdiń qoǵamda áleýmettik turǵydan qoldaýǵa zárý, ózderin qoǵamnan shet sezinetin jastar bar. Solardy “baýyrmyz” dep baýrap alyp, bóten ideologiiamen ýlaityn toptar bar. Olar basqa kózqarasty moiyndamaidy jáne ózderine tapsyrylǵan nusqaýlardy oryndaýǵa daiyn turady», – deidi dintanýshy.
Sarapshynyń pikirinshe, mundai oqiǵalar qoǵamǵa mańyzdy eskertý bolýy kerek.
«Bul jaǵdai árqaisymyzǵa saq bolýdy eskertedi. Ideologiialyq jáne dini adasýdyń qanshalyqty qaýipti ekenin kórsetedi. Dini immýnitet qalyptastyrý óte mańyzdy – aq pen qarany ajyratý qabileti bolý kerek», – deidi ol.
Terrorizm men radikalizmniń aldyn alý úshin qoǵamnyń jan-jaqty saýatyn arttyrý qajet ekenin de atap ótti.
«Biz halyqtyń dini, tarihi, áleýmettik, ekonomikalyq jáne saiasi saýatyn kóterýimiz kerek. Eger adam sanaly bolsa, túrli aǵymdarǵa ermeidi. Sonda bizdiń elimizge bóten ideologiiany engizgisi keletin taraptardyń úmiti sónedi», – dedi Erkinbek Shoqai.
Onyń aitýynsha, ekstremizmmen kúrestiń bir tarmaǵy – áleýmettik máselelerdi sheshý, sonyń ishinde jumyssyzdyqty azaitý.
«Adamnyń súiikti isi, turaqty jumysy bolsa, ol bóten dúnielerge qyzyqpaidy. Sondyqtan áleýmettik turaqtylyq – qaýipsizdiktiń basty kepili», – dep túiindedi dintanýshy.
Eske salaiyq, Ulttyq qaýipsizdik komitetiniń málimetinshe, 2025 jyldyń qyrkúieginde bes sheteldik azamat terrorlyq shabýyl uiymdastyrmaq bolǵan. Quzyrly organnyń jedel sharalarynyń nátijesinde qylmys jospar satysynda toqtatylyp, kúdiktiler qamaýǵa alynǵan. Tergeý amaldary júrgizilip jatyr.
