شەتەلدىكتەر الماتىدا تەررورلىق اكت جاساماق بولعان. وسى وقيعاعا بايلانىستى ءدىنتانۋشى ەركىنبەك شوقاي ءوز پىكىرىن ءبىلدىرىپ، تەرروريزمنىڭ استارىندا يدەولوگيالىق جانە الەۋمەتتىك سەبەپتەردىڭ جاتقانىن اتاپ ءوتتى، دەپ حابارلايدى Dalanews.kz
«تەرروريزم ءقاۋپىنىڭ سىرتىندا، ارينە، يدەولوگيالىق جانە ساياسي استار بار. ءبىزدىڭ ەلدىڭ تاتۋلىعى مەن بىرلىگى كەيبىر تاراپتارعا ۇنامايدى. سول سەبەپتى ولار ءتۇرلى يدەولوگيالىق نەگىزدەردى، سونىڭ ىشىندە ءدىني باعىتتى دا پايدالانادى»، – دەيدى ساراپشى.
ەركىنبەك شوقايدىڭ ايتۋىنشا، مۇنداي قاۋىپ-قاتەرلەردىڭ بەلسەندىلىگىنە ىشكى فاكتورلار دا اسەر ەتەدى. اسىرەسە، قوعامداعى كەيبىر الەۋمەتتىك ءالسىز توپتار مەن جۇمىسسىز جاستار راديكالدى اعىمداردىڭ ىقپالىنا بەيىم بولۋى مۇمكىن.
«ءبىزدىڭ قوعامدا الەۋمەتتىك تۇرعىدان قولداۋعا ءزارۋ، وزدەرىن قوعامنان شەت سەزىنەتىن جاستار بار. سولاردى “باۋىرمىز” دەپ باۋراپ الىپ، بوتەن يدەولوگيامەن ۋلايتىن توپتار بار. ولار باسقا كوزقاراستى مويىندامايدى جانە وزدەرىنە تاپسىرىلعان نۇسقاۋلاردى ورىنداۋعا دايىن تۇرادى»، – دەيدى ءدىنتانۋشى.
ساراپشىنىڭ پىكىرىنشە، مۇنداي وقيعالار قوعامعا ماڭىزدى ەسكەرتۋ بولۋى كەرەك.
«بۇل جاعداي ءارقايسىمىزعا ساق بولۋدى ەسكەرتەدى. يدەولوگيالىق جانە ءدىني اداسۋدىڭ قانشالىقتى ءقاۋىپتى ەكەنىن كورسەتەدى. ءدىني يممۋنيتەت قالىپتاستىرۋ وتە ماڭىزدى – اق پەن قارانى اجىراتۋ قابىلەتى بولۋ كەرەك»، – دەيدى ول.
تەرروريزم مەن راديكاليزمنىڭ الدىن الۋ ءۇشىن قوعامنىڭ جان-جاقتى ساۋاتىن ارتتىرۋ قاجەت ەكەنىن دە اتاپ ءوتتى.
«ءبىز حالىقتىڭ ءدىني، تاريحي، الەۋمەتتىك، ەكونوميكالىق جانە ساياسي ساۋاتىن كوتەرۋىمىز كەرەك. ەگەر ادام سانالى بولسا، ءتۇرلى اعىمدارعا ەرمەيدى. سوندا ءبىزدىڭ ەلىمىزگە بوتەن يدەولوگيانى ەنگىزگىسى كەلەتىن تاراپتاردىڭ ءۇمىتى سونەدى»، – دەدى ەركىنبەك شوقاي.
ونىڭ ايتۋىنشا، ەكسترەميزممەن كۇرەستىڭ ءبىر تارماعى – الەۋمەتتىك ماسەلەلەردى شەشۋ، سونىڭ ىشىندە جۇمىسسىزدىقتى ازايتۋ.
«ادامنىڭ سۇيىكتى ءىسى، تۇراقتى جۇمىسى بولسا، ول بوتەن دۇنيەلەرگە قىزىقپايدى. سوندىقتان الەۋمەتتىك تۇراقتىلىق – قاۋىپسىزدىكتىڭ باستى كەپىلى»، – دەپ تۇيىندەدى ءدىنتانۋشى.
ەسكە سالايىق، ۇلتتىق قاۋىپسىزدىك كوميتەتىنىڭ مالىمەتىنشە، 2025 جىلدىڭ قىركۇيەگىندە بەس شەتەلدىك ازامات تەررورلىق شابۋىل ۇيىمداستىرماق بولعان. قۇزىرلى ورگاننىڭ جەدەل شارالارىنىڭ ناتيجەسىندە قىلمىس جوسپار ساتىسىندا توقتاتىلىپ، كۇدىكتىلەر قاماۋعا الىنعان. تەرگەۋ امالدارى جۇرگىزىلىپ جاتىر.
