1 qarashadan bastap sýmen jabdyqtaý jáne sý burý qyzmetteriniń kólemin esepteý boiynsha jańa ádisteme kúshine enedi. Keibir BAQ ókilderi jańa esepteý tártibi engizilgennen keiin qazaqstandyqtar kórshileriniń esebinen sýǵa qymbatyraq tóleidi dep habarlaǵan edi. Alaida Ónerkásip jáne qurylys ministrligi bul aqparatty joqqa shyǵaryp, alańdaýǵa negiz joq ekenin málimdedi, dep habarlaidy Dalanews.kz.
Ministrlik aqparatyna súiensek, qabyldanǵan ádisteme jańa tólem túrlerin engizbeidi jáne sý úshin tólem mólsherin arttyrmaidy.
Ministrliktiń túsindirýinshe, qujattyń maqsaty - sýdy jetkizý jáne burý kólemin anyqtaýdyń biryńǵai erejelerin belgileý. Burynǵydai tólem sý eseptegish quraldarynyń kórsetkishteri boiynsha júrgiziledi, iaǵni tutynýshy men sý arnasy jelileriniń shekarasynda ornatylǵan qurylǵy derekteri negizge alynady. Al eseptegishi joq tutynýshylar úshin tólem mólsheri ákimdik bekitken tutyný normalary boiynsha esepteledi.
Kóppáterli turǵyn úilerdiń turǵyndary úshin de esepteý tártibi ózgermeidi. Eger úide jalpy sý eseptegish ornatylyp, keibir páterlerde jeke eseptegishter bolmasa, onda jalpy jáne jeke kórsetkishter arasyndaǵy aiyrmashylyq kondominiým qatysýshylary arasynda proportsionaldy túrde bólinedi. Mundai tártip burynnan qoldanysta bolǵan, endi túsinbeýshilikterdiń aldyn alý úshin ol jańartylǵan ádistemede naqty bekitilip otyr.
"Jasyryn qosymsha tólem bolmaidy. Mundai esepteý tártibi burynnan bar" - dedi Qurylys jáne turǵyn úi kommýnaldyq sharýashylyq isteri komiteti tóraǵasynyń orynbasary Nursultan Kerimqulov.
