Kórshilderiniń aitýynsha, kúdikti týysynyń ekinshi synypta oqityn qyzyn aldap shaqyrǵan. Alaida onysynan túk shyqpaǵan soń úiine kire beriste bas salyp, aýzy-murnyn tumshalap, jaqyn mańdaǵy úilerdiń biriniń jertólesine alyp ketken. Tártip saqshylarymen birge janushyra izdegen týystary kúdiktiniń qylmys ústinde qolǵa túsiripti.
Ekinshi synyp oqýshysyn qorlamaq bolǵan qasykói bir kósheniń boiynda turatyn 30 jastaǵy jigit bolyp shyqty. Áskerde boryshyn ótep kelgen soń, otbasyn quryp, sońynan jaraspaǵan soń ajyrasyp tynǵan eken.
Ol 7 naýryz kúni ishimdikke sylqiia toiyp alyp, osyndai qylmysqa barýǵa oqtalǵan. Bul oqiǵadan shoshyp qalǵan kórshileri onyń boiynan ersi qylyqtar baiqamaǵandaryn alǵa tartty.
Bul keleńsiz oqiǵany estigende mektep ujymynyń tóbelerinen jai túskendei bolypty. Qyzdyń ata-anasynyń janynan tabylyp, birden psihologiialyq kómek kórsetken. Jábirlenýshi otbasyndaǵy úsh balany tuńǵyshy eken. Oqý úlgerimi jaqsy, úlgili oqýshy. Sezikti de osy mektepti támamdapty.
– Balany ata-anasy psiholog biraz profilaktikalyq jumys júrgizýi kerek. Qazir bala emhanada. Ile aýdanyndaǵy balalar emhanasynda profilaktikalyq em alyp jatyr. Balanyń kóńil-kúii jaqsy, em alýda, – dedi mektep direktory Zámzágúl Máripqyzy. Qazirgi tańda kúdikti qamaýǵa alynyp, tergeý amaldary júrgizilýde. Tiisti saraptamalar taǵaiyndalǵan.
– Joǵalyp ketken qyzdy tabý úshin jedel tergeý toby quryldy. Izdestirý sharalary barysynda arada eki saǵat ótkennen keiin sol aýyldyń úi-jailardyń biriniń jertólesinde joǵalǵan qyz tabylǵan. Sol jerde, sondai-aq, 1990 jyly týylǵan kúdikti er adam ustaldy. Bul fakt boiynsha Qylmystyq kodekstiń 120-baby, 4-bóligi boiynsha tergeý amaldary júrgizilýde, – dedi Almaty oblystyq politsiia departamentiniń resmi ókili Aqbota Ázirbek.
Osy oqiǵadan keiin taldybulaqtyqtar, balalaryn mektep túgili dúkenge jalǵyz jiberýden qorqyp qalypty. Mektepke jetektep ákelip, alyp ketip júr. Al kúdiktiniń qylmysy dáleldenetin bolsa 20 jylǵa bas bostandyǵynan airylýy múmkin.
