Ózbekstan premer-mınıstri Abdýlla Arıpov eldegi qoǵamdyq oryndarda jarnamalardyń orys tilinde jazylǵanyn synǵa aldy. Bul týraly jergilikti basylymdar habarlady.

9 naýryzda ótken vıdeoselektorlyq jınalysta úkimet basshysy jarnamalardaǵy qateler jóninde aıtyp, ózbek tili kóbirek qoldanylýy tıis ekenin aıtty.

– Birqatar dúkender, ashanalar «Skoro otkrytıe» nemese «My otkrylıs» dep jazyp qoıǵan. Jarnamalardy orys tilinde jazý ortalyq qalada ǵana emes, aýyldy jerlerde de sánge aınalǵan. Bizdiń tilde jazsaq, eshkim túsinbeı qala ma? Joq, dúkenge eshkim kirmeı qoıa ma? Memlekettik tilge degen patrıottyq sezim bolýy kerek, –  dedi Arıpov.

Úkimet basshysy elde negizgi komýnıkasıa tili ózbek tili ekenin eskertip, jarnamany basqa tilde jazýdy toqtatý kerek ekenin talap etti.