Osylaısha orys áskeriniń abyroıy aırandaı tógilip, kóz aldymyzda aıbarynan jurdaı boldy.
Osy soǵystan keıin reıtıńte Reseı áskeriniń álemniń myqty 10 armıasynyń ishine kire almaı, syrtta qalatyny anyq. Ony oılasa, Pýtınniń sheke-basy tyrysyp, talaǵy tars aıyrylýy múmkin.
Orys áskerin jemqorlyq jegi qurttaı jep bitkenin búkil álem kórdi. Bul soǵys áskerdegi jemqorlyqtyń nege ákep soǵatynyn soqyrǵa taıaq ustatqandaı kórsetkeni anyq. Endi jemqorlyq jaılaǵan elder budan sabaq alýy kerek.
Onyń ishinde Qazaqstan da bar. Basqa-basqa áskerdegi jemqorlyqqa eshkim tózbeý kerek.
Bul soǵys orys áskeriniń áskerı daıyndyǵy plıtýstiń deńgeıinen tómen túsip ketkenin kórsetti. Jaýyngerlik rýh degen atymen joq.
Áldebireýler Amerıka bastaǵan Batys elderi qarý-jvraqty ákelip tógip jatyr dep áńgime aıtýy múmkin. Bul endi orystyń taza propagandasy.
Pýtın ózi "áskerı operasıa" dep ataıtyn soǵysty bastaǵaly bir ótirigen bir ótirikpen jamap keledi.
Ol Ýkraınaǵa basyp kirgende elde áskerı mobılızasıa bolmaıtynyn aıtqan edi. Ol 300 myń áskerimen Kıevti basyp alatyna senimdi bolǵany anyq. Biraq áskeriniń sıqy málim bolǵannan keıin mobılızasıa jasaýǵa májbúr boldy. Sózinde turmaı, ýádesin buzdy.
Al onyń sońy soǵysqa jaramdy orystardyń jappaı elden qashýyna ákep soqqanyna bárimiz bilemiz.
Osylaısha "ýra patrıottar" men "dıvan batyrlar" bóten elge bas saýǵalap, elinen qashýǵa májbúr boldy. Kórshiles elderge údere kóshken orystar endi birazǵa deıin Reseıge attap baspaıtyny anyq.
Búginde Kreml áskerı mobılızasıanyń aıaqtalǵanyn aıtyp, soǵystan qashqan otandastaryn elge qaıtarýǵa tyrysýda. Biraq sarapshylar Reseı bıligi aldaǵy jyldyń qańtarynan bastap jappaı mobılızasıany qaıta bastaıtynyn aıtýda.
Eger bul sóz ras bolsa, Pýtın bir mobılızasıaǵa qatysty eki ret ótirik aıtqan saıasatker retinde tarıhta qalaıyn dep tur.
Jalpy bul soǵys bastalǵaly beri Pýtınniń ótirik aıtýdyń has sheberi ekenine kózimiz jete tústi.
Tamyz aıynda orys áskeri Ýkraına jerinde oısyraı jeńilip jatqanda Pýtın "biz áli soǵysqa shyndap kirisken joqpyz" dep beti búlk etpesten ótirik aıtqan edi.
Dál sol sátte Pýtın Máskeýde lepirip áńgimeı aıtyp, tutas orystyń qulaǵynan teýip jatqanda Pýtınniń aspazshysy hám "Vagner" jeke áskerı kompanıasynyń qojaıyny Evgenıı Prıgojın Reseıdiń túrmelerin aralap Ýkraınaǵa qarsy soǵysýǵa zekterdi úgittep júrgen edi. Nesin aıtasyz, Pýtın men Prıgojın Ýkraınadaǵy soǵysty osylaısha sırkke aınaldyrǵanyn ózderi sezbeı otyrǵan syńaıly.
Qyrkúıekte Reseı Qorǵanys mınıstri Sergeı Shoıgý jartylaı mobılızasıany jarıa etkende áskerı operasıa bastalǵaly beri Reseı bes myńnan astam sarbazynan aıyrylǵanyn aıtyp, ótirikti soqty.
Eger bul soǵysta Reseı shynymende bes myń áskerinen aıyrylsa, mobılızasıa jasap, áýirege túspes edi. Mobılızasıa orys áskeriniń úlken shyǵynǵa ushyraǵanyn meńzeıdi. Al ony Pýtınniń moıyndaǵys joq.
Ýkraına men Batystyń barlaý qyzmeti bul soǵysta Reseıdiń 80 myńnan astam sarbazynan aıyrylǵanyn alǵa tartýda. Reseıdiń áskerı mobılızasıany qolǵa alǵanyna qarap, shynymen de Kremldiń 80 sarbazynan aıyrylǵanyn topshylaýǵa bolady. Óıtkeni ótirik aıtýǵa ábden daǵdylanǵan pýtınshiler esh ýaqytta shyndyqty aıtpaıtyny anyq.
Nurlan JUMAHAN
