5 qarashada saǵat 20:00-de "Rıdder JEO" AQ-da kúl shyǵarý júıesindegi sorǵy isten shyǵyp, saldarynan № 1 qazandyq agregatynyń qosalqy jabdyǵy apatty túrde ajyratyldy.
Salqyndatqyshtyń temperatýrasy josparlanǵan +70 gradýsta +39 gradýsqa deıin tómendedi. Búginde qalanyń 22 myńnan astam abonenti úshin jylý berý tómendetildi.
7 qarashadan bastap oqýshylar qashyqtan oqıdy, sonymen qatar, mektepke deıingi mekemeler jumysyn toqtatady.
Oblys ákimi Danıal Ahmetov túnde shuǵyl Rıdderge kelgen. Ol apattyq jaǵdaıdy joıý jónindegi shtabty basqarady. Shtab táýlik boıy jumys isteıdi.
Resmı málimet boıynsha, qazirgi ýaqytta kúl shyǵarý júıesinde qozǵaltqysh aýystyryldy, iske qosý-jóndeý jumystary júrgizilip jatyr. JEO-ǵa qosymsha 120 tonna mazýt jetkizildi, otyndy jóneltý jumystary júrip jatyr.
Apatty jaǵdaıdy joıý úshin "Qazmyrysh" JSHS JEO-ǵa 20-dan astam qyzmetker jiberip, jóndeý-qalpyna keltirý jumystaryna qosymsha jabdyqtar bóldi. Sondaı-aq, Óskemennen kómek retinde "Vostokvzryvprom" JSHS-niń 20 qyzmetkeri keldi.
"Tabıǵı jáne tehnogendik sıpattaǵy tótenshe jaǵdaılardyń jiktelýin belgileý týraly" Úkimettiń 2014 jylǵy 2 shildedegi № 756 qaýlysyna sáıkes bul apattyq jaǵdaı jergilikti aýqymdaǵy TJ retinde qarastyrylady.
Jaǵdaı ákimdiktiń baqylaýynda.
