5 قاراشادا ساعات 20:00-دە "ريددەر جەو" اق-دا كۇل شىعارۋ جۇيەسىندەگى سورعى ىستەن شىعىپ، سالدارىنان № 1 قازاندىق اگرەگاتىنىڭ قوسالقى جابدىعى اپاتتى تۇردە اجىراتىلدى.
سالقىنداتقىشتىڭ تەمپەراتۋراسى جوسپارلانعان +70 گرادۋستا +39 گرادۋسقا دەيىن تومەندەدى. بۇگىندە قالانىڭ 22 مىڭنان استام ابونەنتى ءۇشىن جىلۋ بەرۋ تومەندەتىلدى.
7 قاراشادان باستاپ وقۋشىلار قاشىقتان وقيدى، سونىمەن قاتار، مەكتەپكە دەيىنگى مەكەمەلەر جۇمىسىن توقتاتادى.
وبلىس اكىمى دانيال احمەتوۆ تۇندە شۇعىل ريددەرگە كەلگەن. ول اپاتتىق جاعدايدى جويۋ جونىندەگى شتابتى باسقارادى. شتاب تاۋلىك بويى جۇمىس ىستەيدى.
رەسمي مالىمەت بويىنشا، قازىرگى ۋاقىتتا كۇل شىعارۋ جۇيەسىندە قوزعالتقىش اۋىستىرىلدى، ىسكە قوسۋ-جوندەۋ جۇمىستارى جۇرگىزىلىپ جاتىر. جەو-عا قوسىمشا 120 توننا مازۋت جەتكىزىلدى، وتىندى جونەلتۋ جۇمىستارى ءجۇرىپ جاتىر.
اپاتتى جاعدايدى جويۋ ءۇشىن "قازمىرىش" ج ش س جەو-عا 20-دان استام قىزمەتكەر جىبەرىپ، جوندەۋ-قالپىنا كەلتىرۋ جۇمىستارىنا قوسىمشا جابدىقتار ءبولدى. سونداي-اق، وسكەمەننەن كومەك رەتىندە "ۆوستوكۆزرىۆپروم" ءجشس-نىڭ 20 قىزمەتكەرى كەلدى.
"تابيعي جانە تەحنوگەندىك سيپاتتاعى توتەنشە جاعدايلاردىڭ جىكتەلۋىن بەلگىلەۋ تۋرالى" ۇكىمەتتىڭ 2014 جىلعى 2 شىلدەدەگى № 756 قاۋلىسىنا سايكەس بۇل اپاتتىق جاعداي جەرگىلىكتى اۋقىمداعى تج رەتىندە قاراستىرىلادى.
جاعداي اكىمدىكتىڭ باقىلاۋىندا.
