Álem jáne Olimpiada chempiondarynyń basyn qosqan doda aldyndaǵy baspasóz jiynyna Resei sporttyq kúres federatsiiasynyń prezidenti Mihail Mamiashvili, PWL týrniriniń atqarýshy direktory Iýrii Fedorov, Olimpbet býkmekerlik keńsesiniń TMD elderindegi marketing boiynsha direktory Elena Meleshina, Qazaqstan kúres federatsiiasynyń vitse-prezidenti Marat Muzaparov jáne grek-rim kúresinen eki dúrkin Olimpiada, úsh dúrkin álem chempiony Roman Vlasov pen Tokio Olimpiadasynyń kúmis júldegeri, qazirgi álem chempiony Aqjol Mahmudovtar qatysty.
Baspasóz máslihatynda sóz alǵan Elena Meleshina Olimpbet býkmekerlik keńsesi elimizdegi kúres túrlerin damytý úshin qoldaý kórsetip jatqanyn málimdedi.
«Shyny kerek, mundai aýqymdy jarys aldynda azdap qobaljyp turmyz. Men úshin kúres ol naǵyz er azamattar ainalysatyn sport. Bul týrnir kúrestiń jankúierlerin odan ári arttyra túsedi dep úmittenemiz. Árine, kúres qazirdiń ózinde óte bedeldi sport túri sanalady. Dese de, bul doda kúrestiń tanymaldyǵyn taǵy da kóteredi degen oidamyz. Bizdi keremet tartysty kezdesýler kútip tur degen senimdemin. Odan bólek, kúresti Qazaqstanda qatty jaqsy kóredi jáne dástúrli sport túri sanaidy. Qazaqstan grek-rim, erkin jáne áielder kúresi federatsiiasymen birge Poddýbnyi ligasymen de áriptestik qarym-qatynas ornatý – bul demeýshi bolýdan da artyq nárse. Qazaqstandyq balýandar da baq synaityn kúres Ligasyna kómektese alatynymyz úshin qýanyshtymyn! Mundai tarihi oqiǵanyń bir bólshegi bolý óte mańyzdy nárse», - dedi Elena Meleshina.
Poddýbnyi ligasynyń atqarýshy direktory Iýrii Fedorov týrnirdi Almatyda uiymdastyrýǵa ne sebep bolǵanyn da aitty.
«Buǵan deiin bizdiń liganyń úsh týrniri ótti. Onyń ekeýi - Máskeýde, biri – Qyrǵyzstan astanasy Bishkekte uiymdastyrylǵan. Osy joly Almatyny tańdaýymyzǵa birneshe sebep boldy. Eń negizgi sebep – bizdiń bas demeýshimiz Olimpbet býkmekerlik keńsesiniń usynysy edi. Bul kompaniia býkmeker naryǵyndaǵy úzdikterdiń biri sanalatynyn bilesizder. Odan bólek, biz týrnirge arnalǵan strimingtik kanal qurǵanbyz. Sol kanal arqyly Qazaqstandaǵy jankúierlerimizdiń kóp ekenin baiqap, Almatyda balýandardyń tartysty básekesin ótkizý týraly sheshim qabyldadyq», - deidi Fedorov.
Al aty ańyzǵa ainalǵan balýan, Resei kúres federatsiiasynyń prezidenti Mihail Mamiashvili bul báseke sportshylarǵa úlken jol ashatynyn aitty.
«Balýandar óz sheberligin arttyryp qana qoimai, aqsha tabýy da kerek. Buǵan Poddýbnyi ligasy kómektesedi. Al men bizdi keremet kezdesýler kútip turǵanyna kámil senemin», - dedi Mamiashvili.
Balýan Sholaq atyndaǵy sport kesheninde ótetin Poddýbnyi ligasy biyl 15 elden kelgen sportshylardyń basyn qospaq. Balýandar básekesinde grek-rim, erkin jáne áielder kúresinen tartysty kezdesýler ótedi. Erkin kúreste Olimpiada chempiony Zaýr Ýgiev (Resei) pen qazirgi álem chempiony Zelimhan Abakanov (Albaniia) arasyndaǵy kezdesý kópshilik nazaryn aýdaratyny anyq.
Al grek-rim kúresiniń juldyzdary – eki dúrkin Olimpiada, úsh dúrkin álem chempiony, reseilik Roman Vlasov pen álem jáne Aziia chempiony, Olimpiadanyń kúmis júldegeri, qyrǵyzstandyq Aqjol Mahmudov arasyndaǵy beldesýdi kórgen de, kórmegen de armanda. Qos myqtynyń ózara tartysyn Balýan Sholaqqa jinalǵan kórermender aqyly striming kanaldyń jazylýshylary tamashalai alady.Vlasov pen Mahmýdov arasyndaǵy kezdesý PWL-4 dodasynyń basty jekpe-jegi bolmaq.
"Men bul beldesýdi asyǵa kúttim. Sebebi bizdegi jaǵdai oryn alǵan soń, Aqjol Olimpiadanyń kúmisin ielenip, álem chempiony atandy. Reseilik balýandar halyqaralyq jarystarǵa qatysa almaǵan soń, Aqjol ekeýmizdiń jolymyz túiispei ketti. Erteńgi kezdesýge tas-túiin daiynmyn", - dedi Vlasov.
Aqjol bolsa, aldaǵy jarystar kestesi belgisiz bolǵanyna qaramastan, toqtaýsyz jattyǵyp júrgen reseilik balýandarǵa alǵysyn aitty.
"Men qolymnan kelgenniń bárin istedim. Endi tek erteń kilemge shyǵyp, beldesý ǵana qaldy. Qoldaýshylarǵa rahmet. Osy oraida, jarystarǵa qatysý múmkindigi belgisiz bolsa da, aianbai ter tógip júrgen reseilik balýandardy erekshe atap ótkim keledi", - dedi Mahmýdov.
Sondai-aq bul básekege qazaqstandyq úsh balýan qatysqaly otyr. Olar – erkin kúresten Aziia chempiony Bolat Saqaev, erkin kúresten eki dúrkin Aziia chempiony, álem birinshiliginiń qola júldegeri Azamat Dáýletbekov jáne áielder kúresinen álem chempionatynyń kúmis júldegeri Jámila Baqbergenova.
Azamat Dáýletbekovtiń qarsylasy – reseilik Arslan Bagaev. Bolat Saqaev PWL-2 týrniriniń jeńimpazy, reseilik Ahmed Ýsmanovpen beldesedi. Jámila Baqbergenova PWL-2 týrniriniń eki dúrkin chempiony, reseilik Kseniia Býrakovaǵa qarsy shyǵady.
Odan bólek, Almatydaǵy balýandar básekesinde Olimpiada chempiony Lýis Alberto Orta Sanchez (Kýba), Olimpiada júldegerderi Sergei Semenov (Resei), Gadji Aliev (Ázirbaijan), Bat-Ochir Bolortýia (Mońǵoliia), álem chempiondary Anastasiia Nikita (Moldova), Joolaman Shárshenbekov (Qyrǵyzstan), Malhas Amoian (Armeniia), Abasgadji Magomedov (Resei), álem chempionatynyń júldegerleri Magomed Kýrbanov (Resei), Batyrbek Tsakýlov (Slovakiia), Sanan Súleimanov (Ázirbaijan), Aik Mnatsakanian (Bolgariia), Oskar Pino Hinds (Kýba) bozkilemge shyǵady.
Jalpy alǵanda PWL-4 dodasynda 13 eldiń balýandary baq synamaq. Poddýbnyi kúres ligasy – álemniń úzdik balýandarynyń qatysýymen ótetin kásibi balýandar ligasy. Mundaǵy júlde qory da qomaqty. 2022 jyly týrnir úsh ret uiymdastyryldy. Onyń ekeýi Máskeýde, bireýi Bishkekte ótken. Osy ýaqytqa deiin Poddýbnyi ligasynda álemniń 15 memleketinen myńǵa jýyq balýandar qatysty. Olardyń qatarynda bes Olimpiada chempiony, tórt álem chempiony men onnan asa Olimpiada, álem, Aziia jáne Eýropa chempionattarynyń júldegerleri bar. Týrnir biyl da aýqymyn keńeitkeli otyr.
