Aqtóbede kópbalaly áieldi psihiatriialyq aýrýhanaǵa jiberip, keiin ony saý dep tanydy. Bul jaǵdaiǵa qatysty Densaýlyq saqtaý ministrligi túsinikteme berdi, dep habarlaidy Dalanews.kz.
15 qazanda áieldiń balalary anasynyń mura máselesine bailanysty janjaldan keiin eriksiz túrde psihiatriialyq aýrýhanaǵa jatqyzylǵanyn málimdegen. Bir apta ótken soń áiel ózi video jariialap, onda dárigerler konsiliýmy ony tolyq saý dep tanyǵanyn aitqan.
Ministrliktiń túsindirmesi
"Psihiatr-dárigerdiń belgili bir sátte qoiǵan diagnozy sol ýaqyttaǵy naýqastyń jaǵdaiyn kórsetedi. Ol klinikalyq belgilerge, baqylaý nátijelerine jáne tekserý derekterine súienedi", – delingen Densaýlyq saqtaý ministrliginiń habarlamasynda.
Vedomstvonyń málimetinshe, ýaqyt aiyrmashylyǵyn jáne naýqastyń psihikalyq jaǵdaiyndaǵy ózgeristerdi eskergen jaǵdaida eki qorytyndynyń da durys bolýy múmkin.
Eske salaiyq, 16 qazanda Aqtóbede bes bala óz otbasynda bolǵan jaǵdaiǵa bailanysty prezident pen qazaqstandyqtardan kómek surap, videoúndeý jariialaǵan bolatyn. Olar bastapqyda Aqtóbe qalasyndaǵy "Aiala" balalar ortalyǵynda ýaqytsha ornalasqan. Balalardyń aitýynsha, anasy bir kúnniń ishinde májbúrli túrde psihiatriialyq aýrýhanaǵa jatqyzylyp, al ózderi ortalyqqa jiberilgen.
Videoda balalardyń biri otbasynyń basyndaǵy jaǵdaidy túsindiredi. Onyń sózinshe, olar osy ýaqytqa deiin naǵashy ájesiniń qolynda turǵan. Alaida úige bailanysty týystar arasynda daý týyndaǵannan keiin, anasyna qysym kórsetilip, úi úlesinen bas tartý týraly ótinish jazýǵa májbúrlengen. Osy oqiǵadan soń anasy aýrýhanaǵa jatqyzylyp, balalar "Aiala" ortalyǵyna jetkizilgen.
Al 23 qazanda aqtóbelik bes balanyń anasyna qatysty jańa derek shyqty. Bul týraly áleýmettik jelide belsendi Aqmaral Basirova málimdedi.
Belsendiniń sózinshe, 24 mamannan quralǵan konsiliým bes balanyń anasy Juldyzdyń jaǵdaiyn qarap, ol tolyqtai saý degen qorytyndy jasaǵan.
