Atyraýda para alǵany úshin sottalǵan burynǵy oblys ákiminiń orynbasary jáne eks-depýtat Baqytgúl Hamenova toıda júr, dep habarlaıdy Dalanews.kz.

Áleýmettik jelide taraǵan vıdeoda ol sheneýnikter men polıseılerdiń arasynda, qurmetti qonaq retinde aldyńǵy qatarda turǵany baıqalady.

Baqytgúl Hamenova 4,5 mıllıon teńge kóleminde para alǵany úshin 7 jylǵa bas bostandyǵynan aıyrylǵan bolatyn. Para Abaı eskertkishin ornatý kezinde alynǵan. Sot sheshimimen ol memlekettik qyzmette jumys isteý quqyǵynan aıyrylyp, múlki tárkilenýge tıis edi.

2022 jyly 15 qarashada Atyraý qalasynyń №2 soty Atyraý oblysy ákiminiń burynǵy orynbasary Baqytgúl Hamenovany 7 jylǵa bostandyǵynan aıyrý, alaıda kámeletke tolmaǵan balalary baryn eskere otyryp, jazany úsh jyldan keıin óteý jóninde úkim shyǵardy.

Sot úkiminde Baqytgúl Hamenovanyń múlki tárkilenetini, "Qurmet" ordeni men memlekettik laýazymdy atqarý quqyǵynan ómir boıyna aıyrylǵany kórsetilgen.

Sot zalynan ýaqytsha bostandyqqa shyqqan soń Baqytgúl Hamenova "sot úkimimen kelispeıtinin, apelásıalyq shaǵym túsiretinin" málimdedi.

Baqytgúl Hamenova isimen birge qaralyp jatqan Atyraý oblystyq mádenıet basqarmasynyń burynǵy jetekshisi Aqylbek Rysqalıevti sýdıa Jumaǵalı Táshimov 7 jylǵa, "Balqytý" JSHS dırektory Ómirtaı Adamovty 4 jylǵa bostandyǵynan aıyrdy.