Premer-Ministrdiń orynbasary Serik Jumanǵarinniń tóraǵalyǵymen ótken keńeste jylyjai sharýashylyqtaryna memlekettik qoldaý sharalarynyń nátijeleri qaraldy.
Biyl alǵash ret sýbsidiialaýdyń jalpy erejelerine fermerlik jylyjailarǵa sýbsidiia alýǵa múmkindik beretin norma engizildi. Endi jylyjailar ornalasqan oblys ákimdikteri tiisti ókimderdi qabyldap, sýbsidiia mólsherin belgileýi tiis.
Aýyl sharýashylyǵy ministrliginiń málimetinshe, qazirgi tańda eki óńirde ǵana bul jumystar júrgizilip jatyr – Shymkent pen Túrkistan oblysynda. Túrkistan óńirinde ónerkásiptik jylyjailarǵa – ónerkásiptik jylyjailarǵa teńge/gektar, fermerlik jylyjailarǵa – 4,8 mln teńge/ga belgilengen. Al Shymkentte biylǵy jyldyń 20 qarashasyna deiin normativter boiynsha ókim shyǵarý josparlanǵan.
– Jylyjai sharýashylyǵyn damytý úshin memleket kelesi qoldaý sharalaryn kórsetýde – investitsiialyq sýbsidiialar aiasynda jylyjai keshenderin salý jáne keńeitý jobalaryn iske asyrý kezinde shyǵyndardyń 25%-yn, tamshylatyp sýarý júiesin qurý jáne keńeitý kezinde 50%-yn óteý kózdelgen. Qazir biz normany 25%-dan 30%-ǵa deiin ulǵaitý úshin jumys istep jatyrmyz.
Budan bólek organikalyq tyńaitqyshtardy, pestitsidterdi, bioagentterdi (entomofagtardy) jáne biopreparattardy, sýaratyn sýdy qospaǵanda, tyńaitqyshtardyń quny sýbsidiialanady.
Sondai-aq maýsymaralyq kezeńde jylytý shyǵyndary sýbsidiialanady. Búgingi tańda 605 fermerlik jylyjai ulttyq standartqa sáikestik sertifikatyn aldy, olardyń ieleri jaqyn arada sýbsidiia alýǵa ótinish bere alady.
Osylaisha, jylyjai sharýashylyqtary óndirisiniń barlyq tsikli memlekettik qoldaý sharalarymen qamtylǵan jáne naryqty qorǵaý boiynsha qosymsha sharalar talap etilmeidi. TRMK Ulttyq akkreditteý ortalyǵynyń málimeti boiynsha, fermerlik jylyjai sharýashylyqtarynyń taǵy 142 ótinimi inspektsiia organdarynyń qaraýynda jatyr, – dep habarlady aýyl sharýashylyǵy vitse-ministri Azat Sultanov.
Keńes qorytyndysy boiynsha Serik Jumanǵarin ákimdikter men baqylaýshy memlekettik organdarǵa kókónisterdi jabyq topyraqqa otyrǵyzý aldynda jylyjailarǵa ýaqytyly kómir jetkizýdi baqylaýǵa alýdy tapsyrdy.
Aita keteiik, jylyjai alańdarynyń negizgi bóligi Túrkistan oblysynda ornalasqan — 824,2 gektar. Almaty oblysynda – 79 gektar, Jambyl oblysynda – 23,2 gektar, Mańǵystaý oblysynda – 15,5 gektar, Qaraǵandy oblysynda – 43 gektar, Aqtóbe oblysynda – 38 gektar, Atyraý oblysynda – 15,6 gektar, Shymkent qalasynda – 139,2 gektar jáne Almaty qalasynda – 11,1 gektar.
Ósimdik sharýashylyǵy óniminiń shyǵymdylyǵy men sapasyn arttyrýdy sýbsidiialaý qaǵidalarynyń 17-tarmaǵyna sáikes, jabyq topyraqta basym daqyldar óndirisin damytýdy sýbsidiialaýǵa arnalǵan normalar alynǵan ósim qorytyndylary boiynsha kókónis daqyldarynyń bir daqyl ainalymyna belgilenedi (1 sharshy metrge egilgen kóshettiń 95%-ynan kem emes).
