Mınıstrlik keleshekte sýbsıdıadan kepildendirýge aýystyrýǵa den qoımaq. Sondaı-aq, salyqtyq yntalandyrý sharalaryn kóbeıtýdi josparlap otyr.
– Qazir shaǵyn jáne orta bıznesti qoldaýdyń negizgi quraly paıyzdyq mólsherlemeni sýbsıdıalaý bolyp otyrǵanyn mınıstrliktiń esine salamyn. Bul – bankten nesıe alý qymbat bolǵandyqtan jasalyp otyrǵan májbúrli shara. Bizde bazalyq mólsherleme tómendep, nesıe qoljetimdi bolmaıynsha, sýbsıdıalaýdyń kúshin joıý týraly aıtýǵa áli erte. Sýbsıdıalaý tetigin jaqsartý boıynsha jumys isteýge keńes beremin, – dedi Keńes tóraǵasy, Májilis depýtaty Amanjan Jamalov.
Jıyn barysynda partıa músheleri «Qarapaıym zattar ekonomıkasy» baǵdarlamasynyń nátıjeliligin de talqylady. Memlekettik organdardyń aqparaty boıynsha 700 mlrd. teńgege myńnan astam jobaǵa qoldaý kórsetilgen.
– Bul jerde olardyń qanshasy iske qosyldy, ár jobanyń júktemesi qandaı degen suraqtar týyndaıdy. Qarajattyń 20%-y ónerkásipke múldem qatysy joq salalardy qoldaýǵa baǵyttalǵan. Importty almastyrýǵa kelsek, Ulttyq ekonomıka mınıstrligi tamaq ónimderin óndirýmen aınalysatyn 144 qarjylandyrylǵan kásiporyn 2020 jyly osyndaı ónimderdiń jalpy ımportynyń 94% óndirdi dep kórsetedi. Alaıda Ulttyq statısıka búrosynyń málimetteri muny rastamaıdy, – dedi Amanjan Jamalov.
Nurotandyqtar ımportty almastyrý boıynsha jumys nátıjeleriniń tómendigin Indýstrıa jáne ınfraqurylymdyq damý mınıstrligi de kórsetip otyr dep esepteıdi.
– Indýstrıa jáne ınfraqurylymdyq damý mınıstrligi negizinen qurylys ındýstrıasynyń jobalaryn usyndy. Qazirgi tańda qurylys materıaldarynyń ımporty 1 mlrd AQSH dollarynan asady, al óńdeý ónerkásibiniń barlyq ımporty 35 mlrd AQSH dollarynan assa, onyń basym bóligi mashına jasaý, hımıa ónerkásibi, metalýrgıa, jeńil ónerkásip, farmasevtıka salalaryna tıesili. Nege bul salalar boıynsha jobalar joq? Iaǵnı, memleket qarajat bóledi, zaýyttar ashyldy dep esep beremiz, biraq statısıka men ımporttyq taýarlar baǵasynyń ósýine qarasaq, jaǵdaı basqasha. Jaýapty vedomstvolar bul máselelerge baıypty qaraý qajet, – dep atap ótti Keńes tóraǵasy.
Jıyn qorytyndysy boıynsha Ulttyq ekonomıka mınıstrligine kásipkerlerdi sýbsıdıalaý tetikterin jaqsartý boıynsha jumys júrgizý, sondaı-aq «Qarapaıym zattar ekonomıkasy» baǵdarlamasy boıynsha iske asyrylǵan jobalarǵa tekserý júrgizý usynyldy. Indýstrıa jáne ınfraqurylymdyq damý mınıstrligine salalar boıynsha ımportty almastyrý josparyn ázirleý jáne árbir kásiporyndy naqty qoldaýmen qamtamasyz etý usynyldy.
