Bul tarapta damyǵan nemis jurtynyń tájiribesi júginý Qazaqstan úshin jańa múmkindikterge jol ashary sózsiz. Energetika salasyn ártaraptandyrýdy kózdep otyrǵan bizdiń el – dástúrli qýat kózderine degen táýeldilikten arylyp, balamaly energiiaǵa oiysýǵa múddeli.
Almatyda ótken «Qazaq-nemis energetikalyq dialogynda» osy máseleniń ózekti tustary tarazyǵa tartylyp, Germaniiada kelgen sarapshylar Qazaqstannyń «jasyl ekonomikaǵa» kóshý potentsialyna joǵary baǵa berdi.
Atalǵan sharaǵa Dalanews.kz tilshisi de qatysqan bolatyn.
Nemistiń energetika agenttiginiń qoldaýymen uiymdastyrylǵan is-sharaǵa Germaniiadaǵy alpaýyt kompaniialardy ókilderi qatysyp, elimizdiń balamaly qýat kózderine investitsiia quiatyn yqylas tanytty.
Solardyń biri álemge áigili – Siemens Energy tehnologiialyq kompaniiasy. Siemens-tiń vitse-prezidenti Ariel Porattyń aitýynsha Qazaqstandaǵy jel jáne kún energiiasynyń bolashaǵy zor.
Astananyń ekonomikany ártaraptandyrýdaǵy bastamalaryn oń baǵalaǵan Porat Siemens-tiń balamaly energiia kózderimen bailanysty innovatsiialardy elge ákelýge yntaly ekenin jetkizdi.
«Qazaqstannyń shikizatqa táýeldilikten arylyp, naryqtyq ustanymdaryn ózgertip jatqany «jasyl ekonomikaǵa» qarjy quiýmen ainalysatyn investorlardyń qyzyǵýshylyǵyn týdyryp otyr.
Prezident Toqaevtyń energetika salasyndaǵy kómirdiń rólin báseńdetýge qatysty bastamalary jahandyq mańyzy bar dúnie. Kómirden bólinetin ziiandy qaldyqtar qorshaǵan ortany ýlap, ekologiianyń tynysyn taryltyp otyrǵany jasyryn emes. Qazaqstannyń kómirden gazǵa kóship, jańartylatyn energiia kózderine basymdyq berý Batys áleminiń taranynan árkezde qoldaý tabady. Bul rette Siemens Energy bul baǵyttaǵy jobalardy júzege asyrýǵa járdemdesetin bolady», – deidi Porat myrza.
Onyń atap ótkenindei bizdiń el «jasyl ekonomikadaǵy» potentsialy jóninen álemdegi úzdik 10 eldiń qataryna kiredi.
Nemistiń ózge de tehnologiialyq kompaniialary osy iske atsalysyp, Qazaqstandaǵy balamaly energiiany damytýǵa qyzyǵýshylyq tanytyp otyr.
Jiynda belgili bolǵandai ázirgi kúni elimizdiń Energetika ministrligi men nemistiń DENA dep atalatyn energetikalyq agenttigi «jasyl ekonomikamen» bailanysty birlesken kontseptsiia ázirleýde.
Jiynda sóz alǵan nemis kásipkerleri mundai áriptestiktiń eki tarapqa da tiimdi bolaryn tilge tiek ettik. Olardyń aitýynsha energetikalyq sektordy jańǵyrtýdaǵy Germaniianyń tájiribesi Qazaqstannyń balamaly energiia kózderine qiyndyqsyz, kedergisiz kóshýine múmkindik beredi.
Elimizdiń nemis jerindegi elshisi Nurlan Onjanovtyń málim etkenindei Qazaqstan Germaniianyń qoqys óńdeý baǵytyndaǵy tájiribesin de qoldanysqa engizbek.
«Nemis biliginiń qoqysty sorttaý men óńdeýdegi memlekettik baǵdarlamasy óz nátijesin berip, osy eldegi ekoahýaldy túzeýge járdemdesti. Biz nemis ekologtarynyń qoqys óńdeýdegi kontseptsiiasyn óz jerimizde iske asyrǵymyz keledi. Osy maqsatta Germaniianyń Ekonomika ministrligimen birlesip, arnaiy joba ázirleý ústindemiz. Joba Taraz qalasynan bastaý alyp, nátije berer bolsa, elimizdiń ózge óńirlerine de taralatyn bolady.
Batys elderinde qoqysty baqylaý, basqarý saiasaty deitin aýqymdy ekologiialyq tujyrym jasalynǵan. Osynyń aiasynda kommýnaldy qaldyqtardy «igerý» ádistemesi ázirlenip, sonyń arqasynda qorshaǵan ortaǵa bólinetin ziiandy qaldyqtardyń mólsheri azaiady» deidi elshi.
Aita ketelik, Germaniianyń Orta Aziia elderimen taýar ainalymynyń 80-85 paiyzy Qazaqstannyń úlesinde. Ótken jyly eki eldiń arasyndaǵy saýda-sattyq kólemi 5,1 mlrd eýrony qurap, 2020 jylǵy mólsherden 32 paiyzǵa asyp tústi. Al biylǵy jyldyń alty aiyndaǵy kórsetkish byltyrǵydan mejeden ozyp, 80 paiyzǵa artty.
