QR Bilim jáne ǵylym ministrligi muǵalimderdiń jumys ýaqyty men tynyǵý ýaqyty rejiminiń erekshelikterin anyqtaityn jańa erejeler ázirledi, dep habarlaidy Dalanews.kz. Qujat talqyǵa salyný úshin kópshiliktiń nazaryna usynyldy.
Erejeler bes jáne alty kúndik jumys aptasy rejimin qamtidy.
Máselen, erejeler jobasynda bilim berý uiymdary qolda bar materialdyq, tehnikalyq jáne kadrlyq resýrstarǵa bailanysty bes jáne alty kúndik jumys aptasyn belgilei alady.
– Bes kúndik jumys aptasy muǵalimderdiń naqty júktemesin, tárbie jumysynyń josparyn, oqý josparyn, sondai-aq oqytýdy uiymdastyrý ádisin eskere otyryp belgilenedi. Bilim berý uiymdarynyń ishki tártip erejelerinde tárbie jumysynyń jospary, oqý jospary, kezekshilik kestesi, sondai-aq bilim berýdi uiymdastyrýdyń ádisin eskere otyryp, barlyq muǵalimder úshin, sondai-aq jekelegen muǵalimder úshin bes kúndik jumys aptasy qarastyrylýy múmkin, delingen qujatta.
Bes kúndik jumys aptasymen jumys isteitin muǵalimder úshin senbi jáne jeksenbi - demalys, alty kúndik jumys aptasy úshin bir kún – jeksenbi.
Muǵalimderdiń jumys ýaqytyna laýazymyna, sondai-aq bilim berý uiymdarynyń túrlerine bailanysty mynalar kiredi: oqytý, tárbie jumystary, oqýshylarmen jeke jumys, ǵylymi, shyǵarmashylyq jáne ǵylymi-zertteý jumystary, sondai-aq qyzmettik mindetterde nemese jeke josparda qarastyrylǵan basqa da pedagogikalyq jumystar, oqýshylarmen ótkiziletin oqytý, dene shynyqtyrý-saýyqtyrý, sporttyq, shyǵarmashylyq jáne basqa sharalar josparlaryn oryndaý.
Bilim berý uiymdary basshylarynyń, olardyń orynbasarlarynyń, basqa da aǵa qyzmetkerlerdiń jumys ýaqyty bilim berý uiymdarynyń qyzmetine basshylyq jasaý qajettiligin eskere otyryp belgilenedi.
Demalý men tamaqtanýǵa úzilis ýaqyty, sondai-aq aýysym kestesi, demalys jáne merekelik demalys kúnderi bilim berýdi uiymdastyrýdyń túrlerin eskere otyryp, ishki erejelermen belgilenedi.
– Jumys berýshi muǵalimderge oqýshylarmen bir ýaqytta, sondai-aq sabaq arasyndaǵy úzilister kezinde jumys ýaqytynda demalý jáne tamaqtaný múmkindigin beredi. Tynyǵý jáne tamaqtaný ýaqyty ishki erejelermen belgilenedi, al túski úzilis 30 minýttan kem bolmaýy kerek, – delingen erejede.
Muǵalimderdiń kezekshiligi sabaq bastalardan 20 minýt buryn bastalyp, sabaq aiaqtalǵannan keiin 20 minýttan aspaýy kerek.
Bul rette muǵalimder úshin jumys ýaqytynyń uzaqtyǵy (jalaqy mólsherlemesi boiynsha pedagogikalyq jumys saǵattarynyń normasy) aptasyna 36 saǵattan aspaityn jumys ýaqytynyń qysqartylǵan uzaqtyǵy negizinde belgilenedi.
Sabaq kestesi muǵalimderdiń jumys ýaqytyn utymdy paidalanýdy eskere otyryp jasalady, biraq sabaqtar arasyndaǵy uzaq úzilisterge jol bermeidi.
Muǵalim sabaqtan bos ýaqyttyn óz qalaýy boiynsha paidalanýǵa quqyly.
Aqyly eńbek demalysyn berýdegi basymdyq jyl saiyn kúntizbelik jyl basynan on kúnnen keshiktirmei bilim berý uiymynyń basshysy bekitken demalys kestesine sáikes aiqyndalady.
Kelesi qyzmetkerlerdiń jyl saiynǵy eńbek demalysyn jazda nemese ózine yńǵaily kez-kelgen ýaqytta alýǵa basymdyǵy bar:
- kámeletke tolmaǵan balany (18 jasqa tolmaǵan) jalǵyz tárbielep otyrǵan ata-analar (qamqorshylar);
- úsh jáne odan da kóp balasy bar áielder;
- eńbek jaraqatyn alǵan jumysshylar;
- emdelýge joldamasy bar kez-kelgen qyzmetker.
Qoǵamdyq talqylaý 2020 jyldyń 3 aqpanyna deiin jalǵasady.
