Mindetti mektep formasyna qarsy petitsiia bir aptanyń ishinde 143 myńnan astam qol jinap, oǵan qarsy shyqqandar sany nebári 6 myńnyń tóńireginde boldy, dep habarlaidy Dalanews.kz.
Petitsiia avtorlarynyń esebinshe, birinshi synyp oqýshysyna eń qarapaiym oqý formasyn daiyndaý úshin kemi 80–100 myń teńge qajet. Bul ortasha jalaqynyń úshten biri. Al tabysy tómen nemese kópbalaly otbasylar úshin bul qoljetpes soma, sondyqtan olar keide nesie alýǵa, keide eń qajet dúnieden únemdeýge májbúr.
Bul máselege qoǵam qairatkerleri de nazar aýdardy.
"Meniń segiz balam bar, onyń beseýi mektepke barady. Balalardy ózim kiindiremin. Turaqty tabysym bolmasa da, qatarlarynan qaldyrmaýǵa tyrysamyn. Memleket kómektesedi, biraq ár satyp alǵan zatqa túbirtek suraidy. Al bazarda ony kim beredi? Býtikte bir balany kiindirýdiń ózi 150–200 myń teńge turady. Balalardy mektepke daiyndaý — men úshin úlken synaq. Baǵa sharyqtap ketti, bári qymbat", – dedi akter Erjan Jamankulov NEGE tilshisine bergen suhbatynda.
Aita keteiik, buǵan deiin ata-analar mektep formasyn alyp tastaý týraly petitsiiaǵa qol jinaǵan edi. Bul týraly "KTK"telearnasy málimdedi.
Eki balanyń anasy Áliia Tuiaqbaeva mektep formasy qymbattaǵanyna qapaly. Onyń sózinshe, balalary oqityn mekteptiń ákimshiligi ata-analarǵa formany tek belgili bir dúkennen alýdy mindettegen. Baǵasy da qaltaǵa aitarlyqtai salmaq salady. Biyl uly men qyzyn tolyq kiindirýge 130 myń teńgeden asa qarajat jumsaǵan.
"Aiaq kiim men jeideni qospaǵanda, eki balaǵa formaǵa 130 myń teńge jumsadym. Ul balaǵa jilet, shalbar, kostiým, qyz balaǵa beldemshe, sarafan jáne shalbar aldyq. Mektep basshylyǵy bárin belgili bir dúkennen satyp alýdy mindettedi. Oqý jylynyń sońynda jinalys ótkizip, aldyn ala daiyndalý kerek ekenin aitty jáne kireberistegi taqtaǵa kelesi jylǵy forma úlgisin ilip qoidy. Meniń oiymsha, erkin stildegi forma qajet emes, tek túsin belgileý jetkilikti", - deidi ol.
Telearna málimetinshe, Almaty dúkenderinde qyzdarǵa arnalǵan jeide men uldarǵa arnalǵan jeideniń baǵasy 5 myń teńgeden bastalady. Al tolyq jiyntyq - kostiým men jeide nemese beldemshe men jeide ata-analarǵa orta eseppen 35 myń teńgege shyǵady eken.
Satýshylardyń aitýynsha, jyl saiyn mektep formasynyń quny shamamen 10-15 paiyzǵa qymbattaidy. Keibir ata-analar mektep formasy qymbat bolǵandyqtan, ony mindetti etpeý kerek dep sanaidy. Ári balanyń úlgerimi onyń ústindegi kiimine bailanysty emes ekenine senimdi. Sondyqtan olar qol jinap jatyr. Ázirge petitsiia 156 ǵana qol jinapty.
Qazir birqatar jekemenshik mektep ózderiniń arnaiy formasyn engizse, memlekettik bilim ordalarynda ǵana biryńǵai úlgi saqtalyp otyr. Alaida saýdagerlerdiń aitýynsha, bul jaǵdai satylymǵa aitarlyqtai áser etken joq. Óitkeni forma mindetti bolǵandyqtan, ata-analar báribir satyp alýǵa májbúr.
Jaýapty ministrlik te árbir oqýshy mindetti mektep formasyn kiiýge tiis dep sanaidy. Olardyń pikirinshe, birkelki kiim úlgisi oqý ornynda tártip pen iskerlik atmosferany qalyptastyryp, balalardyń nazaryn bilim alýǵa aýdarady.
