Almaty turǵyndary qala ákimdigine jeke kompanıalar tarapynan aıtylǵan usynysqa qarsy shyqty, dep habarlaıdy Dalanews.kz.

Mán-jaıy

"Qurylys salasyndaǵy birqatar kompanıa basshysymen keńes ótkizip, olardyń júzege asyryp jatqan jobalaryn talqyladym. Ásirese, Almatynyń týrısik jáne jol ınfraqurylymyn damytýǵa arnalǵan memlekettik-jekemenshik seriktestik negizindegi jobalarǵa erekshe nazar aýdardyq. Seriktestiktiń basym baǵyttaryn anyqtadyq. Ár jobanyń merzimi, qarjylandyrý kólemi men qalaǵa tıgizer tıimdiligin jan-jaqty qarastyrý úshin tıisti basqarmalarǵa tapsyrma berdim", - dep jazdy qala ákimi.

Sondaı-aq, Darhan Satybaldy áleýmettik jelidegi paraqshasyna birneshe jobanyń sýretterin jarıalaǵan. 

Halyqtyń reaksıasy

Jobalardyń ishinde Venesıaǵa uqsas jospar, estakada syzbasy bar. Alaıda bul sheshim qala turǵyndaryna jaqpady. 

Jurt mundaı joba qalanyń máselesin odan ári kúrdelendirip jiberetinin aıtty. Oǵan qosa, halyq qaladaǵy las aýany da synaǵan.

"Tóle bı kóshesindegi estakada qaıdan shyqty? Ol jerde tramvaı jobasy bolady dep edi ǵoı. Ákimdik LRT-dan bas tartty ma?", "Qurmetti qala ákimi. Mundaı magıstral salmasańyzdar eken. Qaladaǵy aýa tym lastanyp ketti, demalý múmkin emes. Aldymen osy máseleni shesheıik. Bul - úlken ekologıalyq problema. Jaıaý qozǵalysty damytý, qoǵamdyq kólikti jetildirý qajet. Tramvaıdy qaıta qaıtaryńyzdar!", "Ekologıa ne boldy?", "Ne degen suryqsyz jolaıryq? Ákimdik durys ýrbanıst taba almaı ma? Maman jaldaýǵa búdjet joq pa? Qala onsyz da búlinip bitti, nege odan ári qurtasyzdar?! Búdjetti "ıgerý" kerek ekenin túsinemin, biraq ar-uıat degen de bolýy kerek qoı", - dep ashyndy qala turǵyndary.