Prezident Aýyl sharýashylyǵy ministri Aidarbek Saparovty qabyldady, dep habarlaidy Dalanews.kz.
Memleket basshysyna agrarlyq salanyń biylǵy on ai ishindegi damý qorytyndysy týraly baiandaldy.
Ministrdiń aitýynsha, esepti kezeńde negizgi makrokórsetkishter boiynsha oń dinamika baiqalady. Ónim óndirýde ótken jyldyń sáikes kezeńimen salystyrǵanda, aýyl sharýashylyǵy 8,2 trillion teńgege jetip 5,4 paiyzǵa artsa, azyq-túlik 9 paiyzǵa ulǵaiyp 3,1 trillion teńge boldy. Al agrosektor taýarlarynyń eksporty 4,7 milliard dollarǵa deiin ósti.
Prezidentke agroónerkásip keshenindegi jaǵdaidy jaqsartý úshin sońǵy eki jylda qabyldanǵan sharalar týraly málimet berildi. Atap aitqanda, ainalym qarajatyn tolyqtyrý jáne aýyl sharýashylyǵy tehnikasyn lizingke alý úshin 5 paiyzdyq mólsherlememen tikelei nesie berile bastady.
Memleket basshysynyń tapsyrmasy boiynsha agroónerkásip keshenin qarjylandyrý kólemi 1 trillion teńgege deiin ulǵaidy. Onyń 250 milliard teńgesi aýyl sharýashylyǵy tehnikasyna jeńildetilgen lizing berýge baǵyttalǵan. Biyl 25 myńnan astam tehnika satyp alyndy. Nátijesinde mashina-traktor parkiniń tozý kórsetkishi 90 paiyzdan 70 paiyzǵa deiin tómendedi.
Qasym-Jomart Toqaevtyń tapsyrmasyna sáikes, Mal sharýashylyǵyn damytýdyń keshendi jospary qabyldanady.
Salany tsifrlandyrý aiasynda «e-AÓK» biryńǵai tsifrlyq ekojúiesin qurý jumystary júrgizilip jatyr. Bul platforma sýbsidiialaý, jer qoryn basqarý, egin, mal jáne balyq sharýashylyqtary boiynsha kórsetiletin qyzmet túrlerin, memlekettik aqparattyq júielerdi ortaq tsifrlyq arnaǵa toǵystyrady.
Kezdesý sońynda Prezident Aýyl sharýashylyǵy eńbekkerleriniń ekinshi forýmynda agroónerkásip keshenin odan ári damytý boiynsha berilgen tapsyrmalardy sapaly oryndaý qajet ekenine nazar aýdardy. Sondai-aq salanyń tiimdiligin arttyrýǵa jáne eldiń azyq-túlik qaýipsizdigin nyǵaitýǵa baǵyttalǵan birqatar mindet júktedi.
