Búginde otandyq qorǵanys kásiporyndary dál osyǵan uqsas tehnikanyń birneshe túrin jasap kórdi. ADEX-2022 áskeri kórmesiniń negizgi bóligi ushqyshsyz ushý júiesine arnaldy. Búginde álemniń qarý shyǵaratyn alpaýyt óndiris oryndary taktikalyq qarýdyń jańa túrlerin jasaýǵa airyqsha mán beredi. Iaǵni, áskeri salaǵa qatysy bardyń bári mundai ónimge asqan qyzyǵýshylyqpen qaraityny sózsiz.
Bul jóninde «Qazaqstan injiniring» ulttyq kompaniiasynyń basshysy Temirjan Ábdirahmanov habardar etti.
Sońǵy kezde áskeri qaqtyǵystarda qoldanylyp júrgen áskeri drondar, oq-dáriler jáne joǵary dáldikti kózdeitin basqa da qarý-jaraq júieleri soǵys qimylyn shapshańdatyp, óte tiimdi ekenin kórsetip júr. Aita ketý kerek, qazir Ázirbaijan qorǵanys salasy osy ádiske kóship, jumysyn meilinshe jandandyra tústi.
Tipti, óz ónimin áleýeti joǵary sheteldik satyp alýshylardyń aldynda uialmai kórsete alatyn deńgeige jetti deýge bolady.
Ushqyshsyz ushatyn qurylǵy jasaý salasynda álem elderi ishinde Izrail men Túrkiia kósh bastap tur. Bul turǵydan Qazaqstannyń jetistigi az bolsa da, bolashaǵy jarqyn deýge negiz bar. Oǵan «Qazaqstan injiniring» ulttyq kompaniiasy basshylyǵy da senim bildirip otyr.
«Qazaqstan injiniring» ulttyq kompaniiasy AQ Basqarma tóraǵasy Temirjan Ábdirahmanovtyń aitýynsha, qazir bizde jasaqtalǵan birneshe joba bar.
«Bul barlaý jasaityn ushqyshsyz ushý apparaty, soqqy jasaityn ushqyshsyz ushý apparaty, sondai-aq dáldikti kózdeitin ushqyshsyz ushý apparaty, áýe shabýylyna tótep beretin qorǵanys júiesin testileýden ótkizýge arnalǵan jylý aǵyny imitatory. Tipti, bul ushqyshsyz ushý apparatyn zombi-maqsatqa da paidalanýǵa bolady. Bolashaqta óz ónimimizdi eksportqa shyǵarsaq degen nietimiz bar», – deidi T.Ábdirahmanov.
Qazir kompaniia óndiristiń tolyq tsiklyn igerip, aldaǵy ýaqytta ónimdi satyp alatyn senimdi seriktes tabýdy da kózdep otyr. Aita ketý kerek, «Qazaqstan injiniring» kompaniiasy ushqyshsyz ushatyn dronnyń úsh túrin jasap shyǵarady. Bul saǵatyna 500 shaqyrymǵa jetetin reaktivti qozǵaltqyshy bar áýe imitatory. Sondai-aq, ushqyshsyz ushatyn apparat zenittik-zymyrandy áskeri jattyǵýy kezinde jaýyngerlik esepteýdi úiretýde qoldanylady. Ekinshi túri – «Shaǵala-M» dep atalady.
«Qazaqstan injiniring» AQ mamandarynyń pikirinshe, búginde kompaniia Ulttyq qorǵanys ýniversitetimen litsenziialyq kelisimge kelip, óndiris aýqymyn aitarlyqtai keńeitip, jaqsartýǵa kúsh salýda. «Shaǵala-M» – baqylaýǵa arnalǵan taktikalyq qural. Tipti, oǵan qarý-jaraqty da ilip qoiýǵa bolady. Bul dron áýe keńistiginde 4 saǵatqa deiin tura alatyn múmkindikke ie.
Al úshinshi qondyrǵy azamattyq maqsatqa arnalǵan. Iaǵni, ony aýyl sharýashylyǵy salasynda, munai-gaz ónerkásibinde, geologiiada, izdeý-qutqarý operatsiialary men monitoringileý sharalaryna paidalanýǵa bolady.
«R&D ortalyǵy Kazakhstan Engineering» JShS bas direktory Ǵani Baiseiitov munyń bárin QR Tótenshe jaǵdaidar ministrligi basshysyna kórsetkende, qyzyǵýshylyq tanytyp, jaqsy qoldaýǵa ie bolǵanyn aitady.
«Qazirdiń ózinde biz jyl sońyna deiin jasap shyǵaratyn úlgini satyp alýǵa niettiler shyǵyp jatyr. Bul keshen eki ushaqtan turady. Eger qajet bolsa, 3-4 ushaq jasaýǵa bolady. Jerústi basqarý stantsiiasy osyǵan suranyp tur. Ol Ol katapýltsyz iske qosylady. Onyń naqty paidaly salmaǵy – 8 keli. Aitpaqshy, bul ushqyshsyz ushatyn qondyrǵy Uly Otan soǵysy kezinde aty ańyzǵa ainalǵan ázirbaijan ushqyshy Leila Mamedbekovanyń qurmetine orai «Leila» dep ataldy», – deidi ol.
Mamandar bul dron 3,5 shaqyrym biiktikke deiin kóterilip, bes saǵat ishinde 160 shaqyrym saǵat jyldamdyqpen usha alatynyn jetkizdi. Áreket radiýsy 100 shaqyrymǵa deiin barady. Osy turǵyda «Qazaqstan injiniring» ujymy bul qondyrǵyny otandyq kúshtik qurylymdar men azamattyq sektor salasynda ǵana paidalanylyp qoimai, sheteldik satyp alýshylar tarapynan da usynys túsetinine úmitti.
