Tatána Brınjak Kıevte turady. Onyń aıtýynsha, qazir qalada jarylys dybystary estiledi.
– Áskerıler aerodromdar, áskerı qondyrǵylar men basqarý ortalyqtary jarylyp jatqanyn, reseılik áskerdiń soltústik shekarany jáne Harkov oblysyndaǵy shekarany kesip ótkenin rastady. Dál qazir Pýtın Ýkraına áskerinen qarýlaryn tastaýdy suraǵan málimdemesi boldy. Biraq bizdiń brondy áskerimiz qandaı da bir zymyran nemese ushqyshsyz zymyrandardy atyp jatyr. Olar kúresip jatyr, shabýyl búkil maıdanda ótip jatyr. Marıýpoldy burshaqsha bombalap jatyr, – dedi ol.
Brınjaktyń aıtýynsha, qazir Kıevten kóp adam ketip jatyr.
– Kıevtiń barlyq kóshesinde keptelis. Qazir men metroǵa bara jatyrmyn. Kóshede bireýler chemodanmen ketip barady, bireýler ıtterin qydyrtyp júr. Árıne, dúrbeleń bar. Sebebi, bankomattarda kezekte turǵan adam kóp. Harkovta da osyndaı jaǵydaı. Dostarym adamdar jappaı ketip jatqanyn jazdy. Kıev meri kez kelgen ýaqytta qorǵanatyn jerge kirý úshin chemodan daıyndap qoıýdy ótindi, – dep qosty ol.
Ekaterına Kabakova Odessa ortalyǵyna jaqyn jerde turady. Ol búgin jarylys dybysynan erte oıanǵanyn aıtady.
– Búgin tańǵy saǵat 5.00-de jarylys dybysynan oıandym, ortalyqtan alys emes jerde turamyn. Áskerler strategıalyq nysandarǵa oq jaýdyrdy degen aqparat bar. Odessa, Kıev, Harkov qalalarynda jarylys boldy. Sırenalar qosylmaǵan. Biz áli úıde otyrmyz, qazirshe tynysh. Ári qaraı ne isteý kerek bilmeımin, túsiniksiz. Men qujattardy jaqyn jerge daıyndap qoıdym. Ýkraınanyń ústinen ushý toqtatyldy, – dedi ol.
Kabakova Odessada soǵys jaǵdaıy engizilgenin, qalada desanttyq áskerler ornalasqanyn aıtty.
– Reseı DHR men LHR moıyndaǵannan keıin búkil Ýkraınadaǵy sıaqty Odessadaǵy ómir ózgerdi. Halyqta mazasyzdyq pen úreı paıda boldy. Qazir áskerde týystary bar nemese áskerı jastaǵy týystary halyq qatty alańdap otyr. Qala bıliginen qosymsha jarlyqtar bolǵan joq. Er adamdar ózderi aýmaqtyq qorǵanys otrádtaryna jazylyp jatyr. Olar rezervke qoıylady, ıaǵnı tótenshe jaǵdaı nemese áskerı jaǵdaı engizilse, osy otrád barady. Olar qalany kúzetedi. Jazylǵandar óte kóp, biraq olar jáı ǵana rezervte tur. Jaqsy jańalyq bombadan jasyrynatyn jerlerdiń tizimi aıtyldy. Eger birdeńe bolsa, adamdar qaıda barý kerektigin biledi. Jalpy kóńil-kúı turaqsyz, ýaıymǵa toly, – dep qosty ol.
Al, jergilikti Telegram arnalary Odessadaǵy janar-jaǵarmaı quıý beketterinde kezek kóp ekenin habarlady. Bankomattardan 1000 grıven ǵana alýǵa bolady, ol jaqta da tolassyz kezek. Mektepter qashyqtan oqytý rejımine aýysty.
