Qazaqstanda mektepterdiń dene shynyqtyrý baǵdarlamasyna júzý sabaqtaryn engizý josparlanyp otyr. Bul týraly Qazaq Aquatics federasıasynyń bas hatshysy Dmıtrıı Balandın málimdedi dep habarlaıdy Dalanews.kz.

Úkimet otyrysy kezinde Dmıtrıı Balandın Dúnıejúzilik densaýlyq saqtaý uıymynyń derekterin keltirip, 2024 jyly álemde 236 myńnan astam adam sýǵa batyp ketkenin, olardyń 82 myńy 1 men 14 jas aralyǵyndaǵy balalar bolǵanyn málimdedi.

«Bul kórsetkishter halyqqa júzýdiń negizgi daǵdylary men sýda qaýipsizdik erejelerin úıretýdiń qanshalyqty mańyzdy ekenin kórsetedi. Osyǵan baılanysty Bilim mınıstrligimen birlesip, júzý sabaǵy dene tárbıesi júıesine engizilip, mektepterdiń dene shynyqtyrý baǵdarlamasynyń bóligine aınalatyn baǵdarlama ázirlenip jatyr», — dedi ol.

Dmıtrıı Balandınniń aıtýy boıynsha, baǵdarlama 2026 jyly Almaty jáne Astana qalalarynda pılottyq rejımde iske qosylady, keıin ony kezeń-kezeńimen búkil elge engizý josparlanyp otyr.