Jetisý oblystyq Bıken Rımova atyndaǵy drama teatrynda qazaq óneriniń maıtalmandary — Qazaqstannyń halyq artısi Almahan Kenjebekova men Qazaqstannyń eńbek sińirgen qaıratkeri Kendebaı Temirbaıulynyń 75 jyldyq mereıtoıyna arnalǵan «Ónerde – 50, ómirde – 75» atty shyǵarmashylyq kesh ótti, dep habarlaıdy Dalanews.kz.

İs-sharaǵa oblys ákimi Beıbit Isabaev, belgili teatr jáne kıno qaıratkerleri Tuńǵyshbaı Jamanqulov, Nurqanat Jaqypbaı, Darıǵa Turanqulova jáne óner súıer qaýym qatysty.

Kesh barysynda sahna sańlaqtarynyń ómiri men shyǵarmashylyǵyna arnalǵan kórme usynylyp, olardyń qatysýymen túsirilgen fılmder men spektáklderden úzindiler kórsetildi.

«Ónerde de, ómirde de taǵdyr joly toǵysqan sahna sańlaqtary kóp emes. Sizderdiń esimderińizdi biz árdaıym qurmetpen ataımyz. Jetisý teatrynyń qalyptasýyna qosqan eńbekterińiz umytylmaıdy», — dedi dedi ákim Beıbit Isabaev.

Keshte Abaı atyndaǵy opera jáne balet teatrynyń ártisteri, «Qońyr» toby men «Il-Kanto» kvarteti óner kórsetti.

Mereıtoılyq sharanyń maqsaty — ulttyq sahna óneriniń damýyna zor úles qosqan qos maıtalmannyń shyǵarmashylyq jolyn dáripteý jáne jas akterlerge ónege etý.