Ishki ister ministrligi esirtki quraldarynyń zańsyz ainalymymen bailanysty qylmystardy anyqtaý jáne toqtatý boiynsha belsendi jumysyn jalǵastyrýda, dep habarlaidy Dalanews.kz Polisia.kz – ǵa silteme jasap.
Erekshe nazar jasóspirimder men jastar arasyndaǵy, sonyń ishinde kámeletke tolmaǵandardyń esirtki ortasyna tartylýyna jol bermeý sharalaryna aýdarylyp otyr. Shamamen 17 myńǵa jýyq esirtkige qarsy is-shara ótkizildi, jasóspirimder men jastardy qamtý sany 2 million adamdy qurady.
Alaida qabyldanyp jatqan sharalarǵa qaramastan, kámeletke tolmaǵandardyń esirtki quraldaryn taratqany úshin ustalý faktileriniń ósý úrdisi saqtalyp otyr.
Máselen, Abai oblysynda politsiia qyzmetkerleri kolledjdiń birinshi kýrsynda oqityn kámeletke tolmaǵan qyzdy asa iri kólemde psihotroptyq zattardy zańsyz saqtaǵany úshin ustady. Tintý barysynda 16 gr sintetikalyq esirtki tárkilendi.
Shyǵys Qazaqstan oblysynda esirtki satqan taǵy bir kámeletke tolmaǵan jasóspirim ustaldy. Ol Almaty qalasynda turyp, Óskemenge kelip, bir ai boiy tyiym salynǵan zattardy satýmen ainalysatyn internet-dúkenniń kýreri-qoimashysy bolyp jumys istegen. Ustaý barysynda odan α-PVP tobyna jatatyn 3 gr sintetikalyq esirtki tárkilendi.
«Búgingi tańda respýblika boiynsha esirtkiniń zańsyz ainalymyna tartylǵan 60-tan astam kámeletke tolmaǵan jasóspirim ustaldy. Ishki ister ministrligi ata-analardy balalarynyń qarym-qatynas ortasyna muqiiat nazar aýdarýǵa, sondai-aq jasóspirimderge “jeńil tabys” nemese “qashyqtyqtan jumys” usynýy múmkin kúmándi áleýmettik jeliler men messendjerlerdi tekserýge shaqyrady.
IIM eske salady: esirtki jáne psihotroptyq zattardy satý úshin ómir boiyna bas bostandyǵynan aiyrýǵa deiingi qylmystyq jaýapkershilik kózdelgen; aldaǵy ýaqytta kámeletke tolmaǵannyń esirtkiniń zańsyz ainalymyna ata-anasynyń kinási nemese tiisti baqylaýdyń bolmaýynan tartylǵany anyqtalsa, ata-analyq mindetterin tiisinshe oryndamaǵany úshin jaýapkershilikti qatańdatý josparlanýda», — delingen habarlamada.
