Almaty qalasynyń soty qurylys kompaniiasy «Alem Qurylys AQ»-ny Bostandyq aýdanynda bolashaq emhana aýmaǵyndaǵy zańsyz aǵash kesý faktisinen keiin 2200 túp aǵash otyrǵyzýǵa mindettedi, dep habarlaidy Dalanews.kz.
Bul sheshim ekologiia basqarmasy anyqtaǵan zańbuzýshylyqtyń nátijesinde qabyldandy. Buǵan deiin merdiger aǵashtardy saqtaý jóninde mindetteme alǵan bolatyn.
Bes.media dereginshe, biyl aqpanda Almaty qalasynyń qurylys basqarmasy men «Alem Qurylys AQ» arasynda táýligine 500 adam qabyldaityn emhana salýǵa kelisim jasalǵan. Qujattarda 51 túp aǵash bar ekeni kórsetilgen, olardyń arasynda joiylyp ketý qaýpi bar sirek túr — emen aǵashy da bar.
Alaida sáýir aiynda vedomstvo mamandary qurylys alańynda 43 aǵashtyń zańsyz kesilgenin anyqtaǵan. Osydan keiin ekologiia basqarmasy sotqa júginip, tapsyrys berýshi men merdigerdi ótemdik aǵash otyrǵyzýǵa mindetteýdi suraǵan.
Sot otyrysynda qurylys basqarmasy men merdiger kompaniia ókilderi aǵash kesý faktisin joqqa shyǵaryp, tekserý aktisinde ýákiletti organnyń móri men jaýapkerdiń qoly joq ekenin alǵa tartqan.
Alaida sot inventarizatsiia men orman-patologiialyq zertteý materialdary 2024 jylǵa deiin daýly aǵashtardyń bar ekenin dáleldeitinin atap ótti. Sonymen qatar, merdiger jer ýchaskesin qabyldai otyryp, jasyl jelekti saqtaýǵa mindettengen.
«Aktidegi aǵashtar men butalardyń túrleri men sanynyń kórsetilmeýi - osy jaǵdaidy qabyldaǵan taraptyń kemshiligi bolyp tabylady. Al búginde daýly jasyl jelekterdiń joqtyǵy eki tarappen de moiyndalǵan», – delingen sot sheshiminde.
Nátijesinde sot aǵashtardyń zańsyz kesilý faktisin eskerip, «Alem Qurylys AQ» JShS-in ótemdik kógaldandyrý jumystaryn júrgizýge mindettedi.
««Alem Qurylys AQ» JShS-in qoldanystaǵy zańnama talaptaryna sáikes qoǵamdyq paidalaný jerlerinde 2200 túp aǵash otyrǵyzýǵa jáne olardy úsh jyl boiy kútip-baptaýǵa mindetteý», – delingen sheshimde.
