الماتى قالاسىنىڭ سوتى قۇرىلىس كومپانياسى «Alem Qurylys AQ»-نى بوستاندىق اۋدانىندا بولاشاق ەمحانا اۋماعىنداعى زاڭسىز اعاش كەسۋ فاكتىسىنەن كەيىن 2200 ءتۇپ اعاش وتىرعىزۋعا مىندەتتەدى، دەپ حابارلايدى Dalanews.kz.
بۇل شەشىم ەكولوگيا باسقارماسى انىقتاعان زاڭبۇزۋشىلىقتىڭ ناتيجەسىندە قابىلداندى. بۇعان دەيىن مەردىگەر اعاشتاردى ساقتاۋ جونىندە مىندەتتەمە العان بولاتىن.
Bes.media دەرەگىنشە، بيىل اقپاندا الماتى قالاسىنىڭ قۇرىلىس باسقارماسى مەن «Alem Qurylys AQ» اراسىندا تاۋلىگىنە 500 ادام قابىلدايتىن ەمحانا سالۋعا كەلىسىم جاسالعان. قۇجاتتاردا 51 ءتۇپ اعاش بار ەكەنى كورسەتىلگەن، ولاردىڭ اراسىندا جويىلىپ كەتۋ ءقاۋپى بار سيرەك ءتۇر — ەمەن اعاشى دا بار.
الايدا ءساۋىر ايىندا ۆەدومستۆو ماماندارى قۇرىلىس الاڭىندا 43 اعاشتىڭ زاڭسىز كەسىلگەنىن انىقتاعان. وسىدان كەيىن ەكولوگيا باسقارماسى سوتقا جۇگىنىپ، تاپسىرىس بەرۋشى مەن مەردىگەردى وتەمدىك اعاش وتىرعىزۋعا مىندەتتەۋدى سۇراعان.
سوت وتىرىسىندا قۇرىلىس باسقارماسى مەن مەردىگەر كومپانيا وكىلدەرى اعاش كەسۋ فاكتىسىن جوققا شىعارىپ، تەكسەرۋ اكتىسىندە ۋاكىلەتتى ورگاننىڭ ءمورى مەن جاۋاپكەردىڭ قولى جوق ەكەنىن العا تارتقان.
الايدا سوت ينۆەنتاريزاسيا مەن ورمان-پاتولوگيالىق زەرتتەۋ ماتەريالدارى 2024 جىلعا دەيىن داۋلى اعاشتاردىڭ بار ەكەنىن دالەلدەيتىنىن اتاپ ءوتتى. سونىمەن قاتار، مەردىگەر جەر ۋچاسكەسىن قابىلداي وتىرىپ، جاسىل جەلەكتى ساقتاۋعا مىندەتتەنگەن.
«اكتىدەگى اعاشتار مەن بۇتالاردىڭ تۇرلەرى مەن سانىنىڭ كورسەتىلمەۋى - وسى جاعدايدى قابىلداعان تاراپتىڭ كەمشىلىگى بولىپ تابىلادى. ال بۇگىندە داۋلى جاسىل جەلەكتەردىڭ جوقتىعى ەكى تاراپپەن دە مويىندالعان»، – دەلىنگەن سوت شەشىمىندە.
ناتيجەسىندە سوت اعاشتاردىڭ زاڭسىز كەسىلۋ فاكتىسىن ەسكەرىپ، «Alem Qurylys AQ» ءجشس-ىن وتەمدىك كوگالداندىرۋ جۇمىستارىن جۇرگىزۋگە مىندەتتەدى.
««Alem Qurylys AQ» ءجشس-ىن قولدانىستاعى زاڭناما تالاپتارىنا سايكەس قوعامدىق پايدالانۋ جەرلەرىندە 2200 ءتۇپ اعاش وتىرعىزۋعا جانە ولاردى ءۇش جىل بويى كۇتىپ-باپتاۋعا مىندەتتەۋ»، – دەلىنگەن شەشىمدە.
