«Qazaqstan bıyl jańa sheteldik naryqtarǵa — Belgıa, Portýgalıa, Polsha, Norvegıa, Ulybrıtanıa, Vetnam, BAÁ jáne Soltústik Afrıka elderine astyq jetkizýdi bastaǵanyn» aýyl sharýashylyǵy mınıstri Aıdarbek Saparov Úkimet otyrysynda málimdedi dep habarlaıdy Dalanews.kz.

Mınıstrdiń sózinshe, óndirilgen astyq kólemi eldiń ishki suranysyn tolyq qamtamasyz etýge múmkindik beredi, sonymen birge eksporttyq áleýet saqtalady.

Aıdarbek Saparov atap ótkendeı, ótken maýsymdaǵy astyq eksporty 13,4 mln tonnany qurady, bul aldyńǵy marketıńtik jylmen salystyrǵanda 47%-ǵa kóp. Mundaı ósimge kóliktik sýbsıdıalardyń áseri boldy.

«Biz eksport deńgeıin saqtaý josparyn júzege asyrýdamyz, sondyqtan bul sharanyń merzimi 2026 jylǵy 1 qyrkúıekke deıin uzartylǵanyn» vedomstvo basshysy atap ótti.

Sonymen birge, jańa baǵyttardan basqa, Qazaqstan Iran, Ázirbaıjan, Armenıa jáne Grýzıaǵa astyq jetkizýdi qaıta bastaǵanyn aıtty.

«Bizdiń astyqqa suranys joǵary deńgeıde saqtalyp otyr, jańa ónimnen bastap shamamen 2,2 mln tonna eksporttalǵan, bul ótken maýsymnyń sáıkes kezeńimen salystyrǵanda 21%-ǵa kóp», — dep habarlady Saparov.

Memleket basshysynyń joǵary qosylǵan qunǵa ıe ónimderdi eksporttaýdy yntalandyrý jónindegi tapsyrmasy aıasynda elde astyqty tereń óńdeýge baǵyttalǵan bes ınvestısıalyq joba júzege asyrylýda. Bul jobalar naryqtan qosymsha shamamen 2,5 mln tonna astyq alýǵa múmkindik beredi.