Qostanai oblysynda 2022 jylǵy alapat órtten zardap shekken Amanqaraǵai ormanyn qalpyna keltirýge arnalǵan aýqymdy ekologiialyq aktsiia ótti. Is-shara barysynda AGROMASH jáne Allur mashina jasaý kásiporyndarynyń 300-den astam qyzmetkeri 5 myńnan astam qaraǵai kóshetin otyrǵyzdy, dep habarlaidy dalanews.kz.
Aktsiia bastamashysy – jumysshy jastardyń kúshimen qurylǵan «Eńbek jastary» qozǵalysy. Shara Memleket basshysy Qasym-Jomart Toqaev bastamashylyq etken «Taza Qazaqstan» jalpyulttyq ekologiialyq baǵdarlamasy aiasynda uiymdastyryldy.
Amanqaraǵai ormany Qazaqstandaǵy mańyzdy tabiǵi aimaqtardyń biri sanalady. Aktsiiaǵa qatysýshylardyń aitýynsha, ormandy qalpyna keltirý – tek ekologiialyq shara ǵana emes, azamattyq jaýapkershiliktiń kórinisi.
AGROMASH zaýytynyń prezidenti Dinara Shýkijanova 2022 jylǵy órt kezinde óńir turǵyndaryna kómekteskenderin eske aldy.
– Amanqaraǵaida órt bolǵan kezde shette qala almadyq. Bul – meniń týǵan jerim. Biz adamdardy evakýatsiialaýǵa kómektestik, alǵashqy kómek kórsettik. Qazir sol ormandy qaita qalpyna keltirýge atsalysyp jatyrmyz. Bul – bolashaq úshin jasalyp jatqan mańyzdy is, – dedi ol.
Ekologiialyq aktsiia barysynda eriktiler qozǵalysy men jastardyń tabiǵatty qorǵaýdaǵy róline erekshe nazar aýdaryldy. Uiymdastyrýshylardyń aitýynsha, mundai bastamalar qoǵamdy ortaq qundylyqtar tóńiregine biriktirip, ekologiialyq mádenietti qalyptastyrady.
Allur zaýytynyń dánekerleýshisi Dias Berikov aǵash otyrǵyzý arqyly ár adam tabiǵat aldyndaǵy jaýapkershilikti tereńirek sezinetinin aitty.
– Biz óndiriste tek tehnika jasap qana qoimai, týǵan jerimiz úshin paidaly is atqarǵymyz keledi. Patriotizm – sóz emes, naqty áreket, – dedi ol.
«Semiozernoe orman sharýashylyǵy mekemesi» KMM basshysy Rinat Serdenbaev órtten keiin tabiǵat birtindep qalpyna kelip jatqanyn atap ótti. Onyń aitýynsha, eki jyldyq qaraǵai kóshetteri jergilikti topyraqqa jaqsy beiimdeledi jáne olardyń jersiný deńgeii joǵary.
Eske salaiyq, 2022 jyly Qostanai oblysynda bolǵan tabiǵi órt óńir tarihyndaǵy eń iri apattardyń biri boldy. Saldarynan shamamen 25 myń gektar orman alqaby zardap shekken edi.
