Almatyda qylmystyq top isi boiynsha tárkilengen liýks sanatyndaǵy Rolls‑Royce Ghost kóligi elektrondy aýktsion arqyly satyldy. Avtokólik e-Qazyna platformasyndaǵy saýdada 26,7 mln teńgege ótken, dep habarlaidy dalanews.kz.
Aq tústi 2013 jylǵy Rolls-Royce Ghost Family kóligi baǵany tómendetý tásilimen saýdaǵa shyǵarylǵan. Buǵan deiin sarapshylar onyń qunyn shamamen 62,6 mln teńge dep baǵalaǵan. Alaida aýktsion barysynda kólik baǵasy aitarlyqtai arzandap, shamamen 2,5 ese tómen somaǵa satylǵan. Al bastapqy saýda baǵasy tipti 187,7 mln teńge bolǵan.
Aýktsion materialdaryna sáikes, kóliktiń salony men kýzovy jaqsy saqtalǵan. Biraq kólikte otaldyrý kilti, tirkeý qujattary jáne keibir bólshekteri bolmaǵan. Endi kólikti rásimdeý, salyq, aiyppul jáne barlyq shekteýlerdi alyp tastaý shyǵyndaryn jańa iesi óz moinyna alady.
Buǵan deiin Eldos Qospaev reiderlik jolmen biznes tartyp aldy dep aiyptalǵan uiymdasqan qylmystyq top isi boiynsha kináli dep tanylǵan edi. Tergeý málimetinshe, keltirilgen shyǵyn kólemi 18 mlrd teńgeden asqan.
Tergeý kezinde shamamen 9 mln dollar, elitalyq jyljymaityn múlik, zergerlik buiymdar jáne 19 premiým kólikke tyiym salynǵan. Olardyń arasynda Tesla Model S, Mercedes-Benz, BMW, Lexus jáne Land Rover markalary bolǵan.
2025 jyldyń qańtarynda sot Eldos Qospaevty 15 jylǵa bas bostandyǵynan aiyryp, múlkin tárkileý týraly úkim shyǵarǵan.
