Tikelei efirge № 44 kitaphananyń oqyrmandary, Ortalyqtandyrylǵan kitaphanalar júiesiniń kitaphanashylary, sonymen qatar «Qazaq avtomobil - jol» institýtynyń professory T.B. Nurpeiisova, tárbie isi jónindegi dekan orynbasary, pedagogika magistri G.Baimaǵambetova men 1-kýrs stýdentteri de qatysty.
Ótken 2019 jyly qala kúnine orai Ortalyqtandyrylǵan kitaphanalar júiesiniń uiymdastyrǵan «Almaty oqyrman qala» aktsiiasy aiasynda ótken aqyn-jazýshylarmen kezdesýden keiin avtordyń tvorchestvosyna qyzyǵýshylar kóbeiip, jazýshynyń «Ómir súrgim keledi», «Ómir súrsem... kesh emes» degen kitaptaryn kezekke jazylyp, qoldan˗qolǵa tigizbei oqityn oqyrmandar qatary kóbeigen edi.
Sondyqtan №44 kitaphanasynyń qyzmetkerleriniń zamanaýi taqyryptarǵa qalam tartqan qalamgerdiń internet júiesinde ótkizgen bul kezdesýi de qyzyqty ótti. Álqissasyn «Rýhani jańǵyrýdan» bastaǵan avtor óz oqyrmandaryna elimizdiń Táýelsizdigi ǵasyrlar boiy ata˗babamyzdyń asyl armany bolǵanyn aita kelip, osy basymyzǵa qonǵan baqty ushyryp almai, ustap qalý – jastarymyzdyń mindeti ekenin, ulttyq kod pen ǵasyrlar boiy qalyptasqan ulttyq mádenietimizdi joǵaltyp almai, ary qarai damytý, alyp júrý bilimdi jastardyń osy zamanǵa laiyq, sanaly azamat bolyp qalyptasýyna bailanysty ekenin basa aitty.
XX ǵasyrdaǵy qazaq halqynyń basyna túsken taýqymetterdi jeke˗jeke atai kelip, osy aqtańdaqtardy joiýdyń joly, qazaq halqynyń bolashaǵy, bar úmiti jastardyń qolynda ekenin qadap aitty.
Ulttyq damýdyń ǵasyrlar boiy jalǵasyp kele jatqan óz jolyn taný úshin kórkem ádebietti kóp oqý kerek ekenin, osy jolda jasalynyp jatqan aqyn, jazýshylardyń jankeshti eńbekteriniń baǵalanýy kerek ekenin tilge tiek etti. Óz jerinde solaqai saiasattyń kesirinen azshylyqqa ushyraǵan qazaq halqynyń demografiialyq aqýalyn da, ekologiialyq apattan da qutqaratyn, ornyna keltiretin, jolyn tabatyn bilimdi, sanaly jastar ekenin aita ketti. Qazaq tili men mádenieti qurdymǵa ketpeýi úshin jastarymyzdyń bilimdi, otansúigish, el azamaty bolýǵa umtylýy kerek ekenin aitty.
Osy qiynshylyqtardy arqaý etip, zamandastarymyzdyń kórkem beinesin somdaǵan shyǵarmalaryna toqtalyp, tanystyrdy, jatyq tilmen áńgimelep berdi.
Zamanymyzdyń eń úlken qasireti – isik aýrýyna shaldyqqan naýqastar jaily jazylǵan, eń kóp oqylǵan, oqyrmandardyń júreginen jol tapqan «Qorqynysh» degen áńgimesiniń stsenariiin jazǵanyn, dramatýrgiianyń korifeii E.Obaevtyń tanysyp, «Kino túsirseń bolady!» dep, óz pikirin bildirgenin, ári jumysynyń qaýryttyǵyna qaramai, úlken kisiniń birden oqyp bergenin úlken súiispenshilikpen oqyrmandaryna áńgimelep berdi.
Úlken iltipatpen kókiregine qolyn qoiyp, qimai qoshtasqan jazýshymen keńistiktegi kezdesý osylai, birdemde ótip ketti.
