2024 jyldyń 28 qyrkúieginde Qazaqstan-Britan tehnikalyq ýniversitetinde (QBTÝ) Respýblika kúni aiasynda “KBTU Unlocked 2024” interaktivti oiyny ótti. Bul shara ýniversitetke kelgen qonaqtarǵa QBTÝ-dyń bai tarihymen jáne zamanaýi tehnologiialarymen tanysýǵa múmkindik berdi, dep habarlaidy Dalanews.kz.
Kvestke qatysýshylar komandalarǵa bólinip, ýniversitettiń qyzyqty aimaqtaryn zerttedi. Atap aitatyn bolsaq, Gamelab zerthanasyn, Qazaqstan teńiz akademiiasynyń simýliatorlaryn, akademik D.A.Qonaev kabinetin, sondai-aq robototehnika jáne nanotehnologiia zerthanalaryn tamashalady. Oiyn barysynda komandalar jumbaqtardy sheship, tapsyrmalardy oryndaý arqyly ár kezeńge ótip otyrdy.
Oiynnyń basty maqsaty – sońǵy jumbaqty sheship, 2001 jyly Qasym-Jomart Toqaev QBTÝ qurý týraly qol qoiǵan Úkimet qaýlysynyń kóshirmesin tabýǵa negizdeldi.
Kvest erekshe aýrada ótti. Máselen, vizýaldy jáne jaryq effektileri oiynnyń qyzyq ótýine sebep boldy. Eń mańyzdysy, atalmysh kvest birlesken jumysqa baǵyttaldy, iaǵni komandalar ortaq maqsatqa jetýi úshin birigip áreket etti.
QBTÝ-dyń zamanaýi tehnologiialaryn kórsetýge arnalǵan “KBTU Unlocked 2024” oiyny ýniversitettiń ǵylymi jáne zertteý jetistikterin aiqyn kórsetti.
Osy tusta QBTÝ-da GameLab zerthanasynyń jetekshisi Aleksandra Knysheva oqý ordasynda uiymdastyrylǵan sharaǵa qatysty óz oiyn bólisti.
"Biz Almatynyń biregei ǵimarattarynyń biri – QBTÝ-dy kórsetkimiz keldi. Bul oryn kópshilikke málim ári ony qalanyń kórikti nysandarynyń biri retinde baǵalaidy. Ókinishke qarai, onyń ishki álemimen tanysqan jandar bireń-sarań. Biz osy ǵimarattyń qazirgi tynysyn, onyń ishki ómirin kórsetkimiz keldi. Onyń erekshe tarihy bar, al biz osy tarih pen bolashaq arasyndaǵy bailanysty erekshe formatta uiymdastyrýdy kózdedik. Bul ideianyń negizinde stýdentterimiz ótken qundylyqtardy boiyna sińirip, ony bolashaqqa jetkizedi”, - dedi Knysheva.
Sonymen qatar ol oiynnyń erekshelikterine de toqtalyp ótti.
“Bizdiń kvesttiń ańyzyna sáikes, tanymal bloger Alina Kim QBTÝ ǵimaratyna onyń qupiialary men jumbaqtaryn zertteý úshin kirip, kezdeisoq bir aýditoriiada qulyptalyp qalady. Kvestke qatysýshylar onyń qai aýditoriiada ekenin anyqtap, ony shyǵarý jolyn tabýy kerek boldy. Olarǵa jol kórsetýshi retinde QBTÝ-dyń maskoty, jasandy intellekt arqyly “jan bitken” britandyq mysyq kómekke keldi”, - dep qosty ol.
Aitýynsha, jobany ýniversitettiń stýdentteri men qyzmetkerleri ázirlegen.
“Maskot bizdiń oiynymyzdyń basty elementine ainaldy. Sonymen qatar qatysýshylarǵa QBTÝ stýdentteri járdem berdi. Olar ǵimarattyń ár buryshyn jaqsy biledi. Osylaisha qatysýshylarǵa ár aýditoriiada buryn ne bolǵanyn, qazirgi ýaqytta qandai jobalar júrgizilip jatqanyn túsindirdi. Mysaly, robototehnika zerthanasynda qatysýshylar drondar jasap, jasandy intellektpen jumys isteitin stýdentterdiń jumysymen tanysty.
Olar, tipti, bizdiń maskot mysyqpen dos bolatyn robo-itpen de kezdesti. Al Game Lab zerthanasynda bolashaqqa arnalǵan video oiyndardy kórdi. Qazirgi tańda bizde Qazaqstannyń mádeni jáne tarihi kontekstin ashatyn bilim berý oiyndaryn jasaý jumystary belsendi túrde júrgizilip jatyr”, - deidi Knysheva.
Onyń sózinshe, qatysýshylar el tarihyndaǵy aitýly tulǵa Dinmuhamed Qonaevtyń da jeke kabinetimen tanysqan.
“Árine, qatysýshylar Qonaev aýditoriiasyna da bardy. Bul aýditoriiada qazir stýdentter oqysa da, interer sol burynǵy qalpynda saqtalǵan. Qonaevtyń jumys ústeli men paidalanǵan kartasy ǵana qalpyna keltirilgen. Osyndai erekshe ortada bizdiń stýdentter eldiń tarihyn tereńirek túsinip, ony bolashaqqa jetkizý úshin bilim alýda," – dep bólisti Aleksandra Knysheva.
Oiynda tóbe kórsetken qatysýshylardyń da alǵan áseri erekshe boldy.
“Maǵan oiyn qatty unady. Ásirese, logikalyq suraqtar miymyzǵa jańa serpilis berdi. Sondai-aq jańa ortamen tanysýǵa múmkindik týdy. Bárimiz ortaq maqsatqa jetý úshin birlesip tapsyrmalardy oryndadyq”, - deidi qatysýshy Aiym Májit.
Aita keteiik, kvest uiymdastyrýshylary QBTÝ boiynsha Táýelsizdik kúni, Naýryz jáne Memlekettik rámizder kúni siiaqty merekeler qarsańynda birqatar ekskýrsiia ótetinin jariialady. Endi barlyq niet bildirýshiler kampýstyń qyzyqty jerlerin zertteýge jáne onyń tarihymen, innovatsiialarymen tanysýǵa múmkindik alady.
