Qazaqstan "Qurty-Býrylbaital" avtojolyn jóndeýge ýáde bergen túrik kompaniiasynan 5,9 milliard teńge avansty sot arqyly qaitaryp aldy, dep habarlaidy Dalanews.kz.
Ádilet ministrliginiń aqparatynsha, 2021 jylǵy 25 qazanda Kólik ministrliginiń Avtomobil joldary komiteti "F&A Road Construction" kompaniiasymen "Qurty-Býrylbaital" avtojolyn jóndeý týraly kelisimshart jasasqan. Tehnikany jumyldyrý jáne materialdardy daiyndaý úshin túrik kompaniiasyna 5,9 milliard teńge avans aýdarǵan. Alaida túrik merdigeri jóndeý jumystaryn bastamaǵan. Qazaqstan tarapy jarty jyldan keiin kelisimshartty birjaqty tártippen buzyp, avansty qaitarýdy talap etken. Biraq túrik kompaniiasy muny oryndamaǵan.
"Úkimettiń tapsyrmasymen Ádilet ministrligi merdigerge qarsy tórelik bastap, aqshany qaitarý úshin belsendi sharalar qabyldady. 2024 jylǵy sáýirde «White & Case LLP» zań firmasymen birlesip Parijdegi Halyqaralyq saýda palatasynyń tórelik sotyna ótinish berildi. Jumys barysynda memlekettiń aqshasyn qaitarýǵa basymdyq jasaldy. Nátijesinde 2024 jylǵy maýsymda merdiger bitimgershilik kelisim bekitýdi usyndy, al 2024 jylǵy 28 tamyzda Avtomobil joldary komiteti kelisimge qol qoidy. Osy Kelisimge sáikes merdiger 2024 jylǵy 26 qyrkúiekke deiin 5,9 milliard teńge avansty qaitarýǵa, sondai-aq Ádilet ministrliginiń shyǵyndaryn – qyzmetter úshin 280 000 dollar jáne 85 000 dollar tórelik jarnany óteýge mindetteldi",- dep málimdedi Ádilet ministrligi.
Vedomstvo jol merdigerleriniń mindettemelerdi oryndamaýmen jáne avansty qaitarmaýymen bailanysty osyǵan uqsas taǵy úsh áleýetti daý baryn atap ótti.
