«Jumyspen qamtýdyń jol kartasy» Qainar aýylynyń ajaryn kirgizdi
Raiymbek aýdanynda «Jumyspen qamtý jol kartasy – 2020» baǵdarlamasy sheńberinde kóptegen ister atqarylýda. Aitalyq, Qainar aýyldyq okrýgindegi Manap, Amangeldi jáne O.Tastandieva kóshelerine ortasha jóndeý jumystary júrgizildi. Joldardyń uzyndyǵy 3,2 shaqyrymdy quraidy. Bul jumysqa jumyssyz júrgen aýyl azamattary tartylyp, eńbek etýde.
Aýyl aqsaqaldary jáne jastarmen keńesip, múldem tas tóselmegen oidym-oidymy shyqqan topyraq kóshelerge tas-qum tósetildi. Shoǵan Abyz eskertkishiniń batys jaǵyndaǵy tas joldyń jiegindegi sonaý 60-jyldardyń aiaǵyndaǵy sý tasqyny saldarynan bolǵan úlken shuńqyrlarǵa da tas-qum toltyryldy.
Aýyldyń birtýar azamaty meditsina ǵylymynyń doktory Rahmet Jartybaevtyń demeýshiligimen barlyq kóshe ataýlarynyń taqtaishalary (anshlagtar) talapqa sai jańartylyp, qaitadan ornatyldy. Nátijesinde aýyl kósheleriniń kelbeti aitarlyqtai jaqsardy.
Keńes zamanynan beri qaraýsyz qalǵan aýmaǵy 4 gektardy quraityn aýyl parki Oralbek bastaǵan aýyl azamattarynyń arqasynda tutastai qorshalyp, kóshe jaǵyndaǵy temir qorshaýlary túzetilip, jumyspen qamtý baǵdarlamasymen tartylǵan aýyldyń qyz-kelinshekteriniń kúshimen birkelki túspen syrlanyp, qaitadan qalpyna keltirildi. Park ishindegi qýraǵan aǵashtarǵa biyl sanitarlyq tazalyq jumystary júrgizilýde, al kelesi jyly kóktemde jasyl jelekter otyrǵyzylmaqshy.
Aýyldyq okrýg ákimdigi ǵimaratynyń tozyǵy jetken shatyry men 149 metr qorshaýy da jańartylǵanyn aita ketýimiz kerek. Kóshe boiyndaǵy qisaiǵan qorshaýlar qaita qalpyna keltirilip, birkelki túspen syrlandy.
Aýyl aryqtar traktormen qaita qazylyp, aýyl turǵyndary bas aryqqa sýdyń erte túsýine bailanysty shabyndyq jáne egistik jerlerin sýǵaryp, shóp shabý naýqanyn bastap ta ketti.
Aýyl kelbetiniń ózgerýi bir ǵana ákimdiktiń moinyna artyp qoiatyn sharýa emes. Bul kóp bolyp bitetin sharýa. Aýyldyń ajaryn kirgizip, kórkeitý árbir azamattyń azmattyq boryshyna ainalyý tiis.
